Amerika Qo‘shma Shtatlarida odam o‘ldirish aybida nohaq qamalib, 43 yil davomida qamoqda o‘tgan Subramanyam Vedam nihoyat ozodlikka chiqdi. Bu haqda Zamin.uz xabar berdi.
Biroq uning erkinligi uzoq davom etmadi, chunki u immigratsiya nazorati tomonidan hibsga olindi va Hindistonga deportatsiya qilinishi mumkinligi bildirilmoqda. Bu haqda BBC xabar berdi.
Ma’lumotlarga ko‘ra, Vedam oktyabr oyida yangi dalillar asosida sobiq xonadoshining o‘limi bo‘yicha aybsizligi isbotlandi. Ammo ozodlikka chiqishidan oldin AQSH Immigratsiya va bojxona nazorati xodimlari tomonidan hibsga olindi.
U Hindistonga qaytarilishi ehtimoli mavjud, chunki u AQSHda qonuniy doimiy rezident bo‘lsa-da, 1988-yildagi sud hukmi tufayli deportatsiya ro‘yxatiga kiritilgan. 1980-yilda 19 yoshli talabasi Tom Kinser bedarak yo‘qolgan va uning bosh suyagi o‘q jarohati bilan topilgach, Vedam ayblov ostiga olinib, 1982-yilda umrbod qamoq jazosiga hukm qilingan.
U o‘z begunohligini doim ta’kidlab kelgan va oilasi jinoyatga oid qat’iy dalil yo‘qligini bildirgan. Yangi texnologiyalar yordamida o‘tkazilgan ekspertizalar va DNK tahlillari uning aybsizligini tasdiqladi.
Vedam to‘qqiz oyligida ota-onasi bilan AQSHga ko‘chib kelgan, shu yerda o‘sib-ulg‘aygan va fuqarolik olish uchun ham ariza bergan. Uning advokati Ava Benach uni deportatsiya qilish qarorini keskin tanqid qilib, bu inson hayotidagi adolatsizlikni yanada kuchaytirishini ta’kidladi.
Bu holat Amerika sud tizimidagi eng uzoq davom etgan nohaq qamoq holatlaridan biri sifatida tarixga kirishi mumkin. Vedamning taqdiri hozirgi kunda ham hal qilinmagan bo‘lib, uning oilasi va huquq himoyachilari adolat uchun kurashni davom ettirmoqda.
