Zelenskiy Budapesht sammitida qatnashishga tayyorligini bildirdi

Ukraina prezidenti Volodimir Zelenskiy AQSH va Rossiya prezidentlari Donald Tramp hamda Vladimir Putin o‘rtasida Budapeshtda bo‘lib o‘tishi kutilayotgan uchrashuvda ishtirok etishga tayyorligini ma’lum qildi. Bu haqda Zamin.uz xabar berdi.

NBC News xabariga ko‘ra, Zelenskiy jurnalistning “Siz sammitda qatnashishga tayyormisiz?” degan savoliga ijobiy javob berdi. U Oq uydagi uchrashuvda AQSH prezidentiga ham bu haqda aytgani va har qanday formatda ishtirok etishga tayyor ekanini ta’kidladi.

Zelenskiy Ukrainasiz haqiqiy tinchlik kelishuvi imkonsizligini qayd etdi. Unga ko‘ra, adolatli va barqaror tinchlik uchun har ikki tomonning ishtiroki zarur.

“Bizsiz qanday kelishuv bo‘lishi mumkin?” degan savolga prezident aniq javob berdi. Rossiya bilan urushni to‘xtatish maqsadida Ukraina hududining bir qismini berish mumkinmi, degan savolga Zelenskiy qat’iy rad javobini berdi.

U urushni zudlik bilan to‘xtatmoqchi bo‘lsak, o‘z hududimizda qolishimiz kerakligini, Putinga hech qanday hudud yoki imtiyoz berilmasligini ta’kidladi. Shuningdek, Ukraina rahbari frontdagi vaziyat haqida gapirar ekan, urushda Ukraina yutqazmayotgani, ammo Rossiyaning ham g‘alaba qozonmayotganini bildirdi.

So‘nggi haftalarda Moskva tinch aholiga qarshi havo hujumlarini kuchaytirganini aytdi. Zelenskiyning so‘zlariga ko‘ra, Putin qish mavsumida Ukrainada energiya inqirozini yuzaga keltirish maqsadida havo hujumlarini oshirmoqda.

Oq uy matbuot kotibi Kerolayn Levittning ma’lum qilishicha, Vashington Zelenskiyning Budapeshtdagi uchrashuvda ishtirok etishini qo‘llab-quvvatlaydi. 17-oktyabr kuni Tramp Vashingtonda Zelenskiy bilan uchrashuv o‘tkazdi.

AQSH prezidenti Ukraina rahbari sammitga kelmasligi mumkinligini aytgan, ammo ular doimiy aloqada bo‘lib turishadi. Natijada, Kiyev va Vashington o‘rtasida diplomatik faollik kuchaymoqda.

Zelenskiyning tinchlik muzokaralariga tayyorligi mojaroni siyosiy yo‘l bilan hal etish uchun muhim qadam sifatida baholanmoqda.