Tramp va Zelenskiy uchrashuvida keskin tortishuv yuz berdi
AQSH prezidenti Donald Tramp Ukraina rahbari Volodimir Zelenskiy bilan o‘tgan uchrashuvda keskin munozaralar olib bordi. Bu haqda Zamin.uz xabar berdi.
Muzokara vaqtida Tramp jang xaritasini stoldan uloqtirdi. The Financial Times manbalariga ko‘ra, 17 oktyabr kuni o‘tgan uchrashuv asabiy va tortishuvli muhitda kechgan.
Tramp bir necha bor ovozini ko‘targan va doimiy ravishda so‘kingan. Unga ko‘ra, Ukraina tomoni jang maydonidagi vaziyatni to‘liq nazorat qila olmayapti.
Uchrashuvda Zelenskiy olib kelgan jangovar xaritalar Trampning fikrini o‘zgartirmadi. U front chizig‘i aks etgan xaritani stoldan uloqtirib, bunday narsalarni ko‘rishdan zerikkanini bildirdi.
Manbalarga ko‘ra, Tramp Kiyevdan butun Donbass hududini Rossiyaga berishni va Moskva bilan kelishuvga erishishni talab qilgan. Shuningdek, u Zelenskiyni og‘ir ogohlantirib, “Agar Putin istasa, sizni yo‘q qiladi” degan.
16 oktyabr kuni Tramp Rossiya prezidenti Vladimir Putin bilan telefon orqali suhbatlashgan. The Washington Post xabariga ko‘ra, Putin Donesk ustidan to‘liq nazoratni tan olish evaziga Zaporijjya va Xerson viloyatlarining bir qismini Ukrainaga qaytarishni taklif qilgan.
Iyunda Istanbulda bo‘lib o‘tgan muzokaralarda esa Rossiya tomoni Ukraina qo‘shinlarini ba’zi viloyatlardan chiqarish yoki ularning qayta joylashishini taqiqlash bo‘yicha ikki variantli memorandum taqdim qilgani ma’lum. The Financial Times ta’kidlashicha, uchrashuv davomida Tramp Putin bilan bo‘lgan suhbatdagi fikrlarni takrorlagan va Zelenskiyga ma’ruzalar qilgan.
Muzokaralardan so‘ng Ukraina prezidenti norozi bo‘lib, hissiy tushkunlikka tushgani xabar qilindi. Shu kuni Zelenskiy NBC News telekanaliga bergan intervyusida urushni to‘xtatish uchun har ikki tomon o‘z pozitsiyalarida qolishi kerakligini aytdi.
G‘arb nashrlari fikricha, Tramp mojaroni diplomatik yo‘l bilan hal etishni qo‘llab-quvvatlaydi va Rossiya bilan kelishuvni harbiy harakatlarni to‘xtatishning yagona yo‘li deb hisoblaydi.
