Boliviyada prezidentlik saylovida markaziy nomzod g‘alaba qozondi
Boliviyada 19-oktyabr, yakshanba kuni bo‘lib o‘tgan prezidentlik saylovlarining ikkinchi bosqichi mamlakat siyosatida yangi davrni boshlab berdi. Bu haqda Zamin.uz xabar berdi.
Markaziy yo‘nalishdagi Demokratik Xristian Partiyasidan nomzod senator Rodrigo Pas Pereyra saylovda g‘alaba qozondi. Saylov komissiyasining ma’lumotlariga ko‘ra, Pas 55 foiz atrofida ovoz yig‘ib, raqiblarini ortda qoldirdi.
Bu natija so‘nggi yigirma yil davomida hukmronlik qilgan so‘l siyosatiga barham berdi. So‘nggi o‘n ikki yil davomida Boliviyada siyosiy maydon asosan ikki shaxs — sobiq prezident Evo Morales va amaldagi prezident Luis Arse o‘rtasidagi raqobat bilan ajralib turgan edi.
Ikkalasi ham So‘l Harakati (Movimiento al Socialismo) partiyasining yetakchi vakillari hisoblanadi. Evo Morales konstitutsiyaviy cheklovlar sabab prezidentlikka nomzodini qo‘yolmagan, Luis Arse esa saylov oldidan reytingining pasayishi bois o‘z nomzodini qaytarib olgandi.
58 yoshli g‘olib Rodrigo Pas La-Pas shahrida o‘tkazilgan mitingda xalqqa murojaat qilib, mamlakatda haqiqiy yechimlar taklif etadigan hukumat tashkil etilishini ta’kidladi. U mamlakatning xalqaro mavqeini tiklash va fuqarolarning ishonchini qaytarish ustida ishlashini bildirdi.
Pasning asosiy raqibi, o‘ng qanotdagi Libertad y Democracia partiyasi nomzodi Xorxe Kiroga esa g‘alaba qilgan nomzodni tabrikladi, ammo rasmiy natijalar e’lon qilinishini kutish zarurligini qayd etdi. Shu tariqa, Boliviyada siyosiy manzara tubdan o‘zgardi.
Mamlakat uzoq yillar davomida hukmronlik qilgan so‘l yo‘nalishidan markaziy siyosatchilar boshqaruviga o‘tdi. Bu o‘zgarish nafaqat ichki siyosatda, balki butun Lotin Amerikasi siyosiy muvozanatida ham muhim burilish sifatida baholanmoqda.
