Isroil milliy xavfsizlik vaziri Itamar Ben Gvir G‘azo sektoridagi harbiy harakatlarni qayta boshlashga chaqirdi. Bu haqda Zamin.uz xabar berdi.
Uning so‘zlariga ko‘ra, garovdagilar ozod etilgach, Isroil HAMASga qarshi jangni yanada qat’iyat bilan davom ettirishi zarur. So‘nggi soatlarda Isroil armiyasi G‘azo hududidagi o‘nlab obyektlarga havo zarbalarini amalga oshirdi.
Ushbu hujumlarda 120 dan ortiq o‘q-dori ishlatilgan. Eslatib o‘tish joizki, Isroil va HAMAS o‘rtasida o‘t ochishni to‘xtatish bo‘yicha kelishuv 2025 yilning 10 oktyabrida kuchga kirgan edi.
Ammo 19 oktyabrda Isroil qo‘shinlari Rafah hududiga havo hujumlari uyushtirdi. The Times of Israel nashrining xabar berishicha, bu zarbalar Isroilga qilingan hujumlarga javob sifatida amalga oshirilgan.
So‘nggi voqealardan so‘ng Isroil rasmiylari o‘t ochishni to‘xtatish tartibiga rioya qilishni qayta yo‘lga qo‘yishini ma’lum qildi. Shu bilan birga, har qanday tajovuz yoki kelishuv buzilishiga qat’iy javob berilishi ta’kidlandi.
