Janubiy Koreyada yashovchi 42 yoshli Gil Li Von so‘nggi 15 yil ichida go‘zallikni saqlash maqsadida 400 ga yaqin plastik jarrohlik va kosmetik muolajalarni boshdan kechirgan. Bu haqda Zamin.uz xabar berdi.
U bu jarayonlarga taxminan 300 million von, ya’ni 210 ming dollar sarflagan. Bu haqda tvN STORY telekanalida ma’lum qilingan.
Gil Li Von birinchi marta 2010 yilda plastik jarrohlikka murojaat qilgan. O‘sha paytda universitetga tayyorgarlik ko‘rayotganida vazni ortib, atrofdagilarning tanqidlari va sevgilisining so‘zlari uni ranjitgan.
Shu sabab o‘ziga bo‘lgan ishonchi susaygan. Shundan so‘ng u kosmetik jarrohlik va turli muolajalarni qabul qilishni boshlagan.
Gil peshonaga yog‘ ko‘chirish, burun va iyak plastikasi, ikki qovoq jarrohligi, yuz konturini tuzatish, liposaksiya hamda dermatologik davolanishlarni amalga oshirgan. U 15 yil davomida to‘plangan muolajalar unga yangi ishonch va o‘ziga bo‘lgan hurmatni qaytarishga yordam berganini ta’kidlaydi.
Ba’zan Gil ortiqcha operatsiyalar haqida o‘ylagan, ammo shifokorlar bunday holatning xavfli ekanini bildirgan. Shu bois u hozirgi tashqi ko‘rinishidan qoniqadi va uni saqlab qolish uchun muntazam dermatolog nazoratida turadi.
Gil Li Von plastik jarrohlikdan afsuslanmaydi, aksincha, bu unga yangi hayot va ishonch bag‘ishlaganini bildiradi. Janubiy Koreya dunyoda plastik jarrohlik bo‘yicha yetakchi mamlakatlardan biri hisoblanadi.
Statistik ma’lumotlarga ko‘ra, har uchinchi ayol hayoti davomida kamida bir marta kosmetik amaliyotdan o‘tadi. Bu mamlakatda go‘zallik va tashqi ko‘rinishga katta e’tibor berilishi sababli, plastik jarrohlik keng tarqalgan.
