Xomanaiy Trampning muzokara taklifini qat’iyan rad etdi
Eron oliy rahbari Ali Xomanaiy AQSH prezidenti Donald Trampning Eron bilan muzokaralarni qayta boshlash taklifini qat’iyan rad etdi. Bu haqda Zamin.uz xabar berdi.
Bu haqda Reuters axborot agentligi xabar berdi. Xomanaiy o‘z bayonotida Trampning AQSH Eronning yadroviy salohiyatini yo‘q qilgani haqidagi iddaolari haqiqatga to‘g‘ri kelmasligini ta’kidladi.
Uning fikricha, muzokaralar majburlash va tahdid asosida olib borilsa, bu haqiqiy bitim emas, balki bosim vositasidir. Eron rahbari Tramp o‘zini “bitimlar ustasi” deb atashiga qaramay, kelishuv tahdid va bosim ostida amalga oshirilsa, bu faqat qo‘rqitish va majburlash ekanini aytdi.
Shuningdek, u Trampning Eron yadroviy sanoati yo‘q qilinganligi haqidagi bayonotiga kulib, bu faqat orzu ekanini bildirgan. Xomanaiy ta’kidlaganidek, Eronning ilmiy va texnologik salohiyati saqlanib qolmoqda.
Ma’lumot uchun, avval Tehron va Vashington yadroviy dastur bo‘yicha besh marotaba bilvosita muzokara o‘tkazgan. Biroq iyun oyida Isroil va AQSH tomonidan Eron yadroviy obyektlariga zarba berilishi sababli muzokaralar keskin to‘xtatilgan va 12 kun davom etgan havo jangi bilan yakunlangan.
O‘tgan hafta Tramp Isroil parlamentida so‘zlaganida, G‘azoda HAMAS bilan sulhdan keyin AQSH Eron bilan tinchlik kelishuvi tuzishi mumkinligini aytgandi. Biroq G‘arb davlatlari Eronni yashirincha yadroviy qurol ishlab chiqarishda ayblab kelmoqda.
Tehron esa bu da’volarni rad etib, uran boyitish faqat fuqarolik energetikasi maqsadlariga qaratilganini bildiradi. Sentyabr oyining oxirida BMT Eronga qarshi sanksiyalarni qayta joriy etdi.
Buyuk Britaniya, Germaniya va Fransiyaning hisob-kitoblariga ko‘ra, Tehron 10 yil oldin tuzilgan uranni boyitish bo‘yicha kelishuv shartlarini buzgan. Shu sababli Xomanaiyning so‘nggi bayonoti Eron va AQSH o‘rtasidagi munosabatlarning yaqin kelajakda yumshash ehtimolini deyarli yo‘qqa chiqardi.
Eron rasmiylari bu pozitsiyani mamlakat mustaqilligi va milliy xavfsizligini himoya qilish uchun zarur chora deb hisoblamoqda.
