Nyu-Yorkda 41 yillik qotillik fosh etildi
Ba’zan ilg‘or texnologiyalar yordamida hatto o‘tgan asrda sodir etilgan jinoyatlar ham fosh etilishi mumkin. Bu haqda Zamin.uz xabar berdi.
AQShning Nyu-York shahrida sud-tibbiyot ekspertlari 1984 yildagi qotillik ishini ochishga muvaffaq bo‘ldi. Ushbu tergovda faqat bitta dalil — muzqaymoq tayoqchasi yordam berdi.
Fojia deyarli 41 yil oldin sodir bo‘lgan. Noma’lum shaxs Nyu-Yorkda yashovchi 16 yoshli Tereza Fuskoga hujum qilib, uni o‘ldirgan.
Keyinchalik sud uch erkakka ayblov e’lon qilgan, ular 2003 yilgacha hibsda saqlangan. Shunda DNK tahlili ularning jinoyatga aloqadorligini rad etgan edi.
Yillar o‘tib, tergovchilar ishni qayta ko‘rib chiqishga qaror qilishdi. Okrug rasmiylari 64 yoshli amerikalik Richard Bilodoni kuzata boshladi.
Mutaxassislar uning tashlab ketgan muzqaymoq tayoqchasini laboratoriyaga yuborishdi. Natijada, so‘lak qoldiqlaridan olingan DNK namunasi 1984 yilda qurbon Tereza Fusko tanasidan topilgan DNK bilan to‘liq mos keldi.
Richard Bilodo tezda qo‘lga olindi va o‘smir qizni o‘ldirishda rasman ayblandi. Hozircha u jinoyatga aloqadorligini rad etmoqda.
Okrug prokurorining yordamchisi Jared Rozenblattning so‘zlariga ko‘ra, 2025 yilda hisob-kitob vaqti keldi. Ushbu holat ilg‘or texnologiyalar yordamida uzoq yillar oldingi jinoyatlar ham fosh etilishi mumkinligini ko‘rsatmoqda.
