Tayra Benks issiq muzqaymoqni AQShda sotadi
Mashhur supermodel va tadbirkor Tayra Benks o‘zining yangi g‘oyasi bilan yana bir bor diqqat markazida. Bu haqda Zamin.uz xabar berdi.
Uning Smize & Dream kompaniyasi Hot Mama nomli “issiq muzqaymoq” mahsulotini sotuvga chiqardi. CNN xabariga ko‘ra, bu yangi ichimlik Avstraliyada katta muvaffaqiyat qozongan.
Tayra Benks endi loyihani Amerika Qo‘shma Shtatlarida ham rivojlantirishni rejalashtirmoqda. Yaqin kelajakda mamlakatda maxsus Hot Mama kafelari ochilishi kutilmoqda.
Benks ijtimoiy tarmoqlarda ushbu mahsulotni targ‘ib qilib, uning oddiy ichimliklardan farq qilishini ta’kidladi. Reklama roligida aytilishicha, Hot Mama latte yoki issiq shokolad emas, balki suyultirilgan issiq muzqaymoqdir.
U suyuq, iliq va ichishga tayyor holatda taqdim etiladi. Maxsus usulda chayqalib isitiladigan bu mahsulot yumshoq va qaymoqsimon konsistensiyaga ega bo‘lib, stakandan to‘g‘ridan to‘g‘ri ichish mumkin.
Ijtimoiy tarmoqlarda Hot Mama mahsuloti haqida fikrlar turlicha. Ba’zilari bu g‘oyani juda ajoyib deb baholasa, boshqalar muzqaymoqni issiq holda ichish mantiqiy emas deb hisoblamoqda.
Shunga qaramay, Tayra Benksning “issiq muzqaymoq”i hozirning o‘zidayoq dunyo bo‘ylab katta qiziqish uyg‘otmoqda. Bu yangilik ko‘plab odamlarning diqqatini tortib, yangi trendga aylanishi mumkinligi haqida fikrlar paydo bo‘lmoqda.
