Baliq qarma taomi rasmiy patent bilan himoyalandi

Qoraqalpog‘iston milliy taomlari orasida alohida o‘ringa ega bo‘lgan “Baliq qarma” endi rasmiy ravishda patent bilan himoyalandi. Bu haqda Zamin.uz xabar berdi.

Adliya vazirligi ma’lumotiga ko‘ra, ushbu taom geografik ko‘rsatkich sifatida davlat ro‘yxatiga kiritildi. Bu qaror “Baliq qarma” nomi hamda uning an’anaviy tayyorlanish usullarini huquqiy jihatdan himoya qiladi.

Shu bilan birga, taom sifatining standartlari mustahkamlanib, Qoraqalpog‘istonning gastronomik brendi sifatida kengroq targ‘ib qilinishi uchun imkoniyat yaratiladi. “Baliq qarma” Orol dengizi va Amudaryo deltasi hududlarida shakllangan qadimiy baliqchilik an’analariga asoslanadi.

Taomning tayyorlanish usuli o‘ziga xos bo‘lib, unda pishirilgan baliq, sho‘rva, mayda to‘g‘ralgan sabzavotlar va kichik o‘lchamdagi quritilgan xamir bo‘laklari ishlatiladi. Yog‘ esa piyoz ustiga quyilib, taomga o‘ziga xos ta’m va hid bag‘ishlaydi.

Mutaxassislar ta’kidlaganidek, geografik ko‘rsatkich mahsulotning ma’lum hudud bilan bog‘liqligini, uning sifat va mashhurligini ifoda etuvchi intellektual mulk turi hisoblanadi. Shu tariqa, “Baliq qarma” nafaqat milliy taom sifatida, balki Qoraqalpog‘iston madaniy va gastronomik merosining muhim brendi sifatida tan olindi.

Bu yangilik hududning turizm va gastronomiya sohasini rivojlantirishga ham ijobiy ta’sir ko‘rsatadi.