Janubiy Koreyada maktabda qiz pichoqlandi, o‘qituvchi umrbod qamoqqa hukm qilindi
Janubiy Koreyada jamoatchilikni larzaga solgan va butun mamlakatni g‘azabga keltirgan jinoyat ishi bo‘yicha sud hukmi e’lon qilindi. Bu haqda Zamin.uz xabar berdi.
Sud 8 yoshli qizni shafqatsizlik bilan pichoqlab o‘ldirgan maktab o‘qituvchisiga umrbod qamoq jazosini tayinladi. Ma’lumotlarga ko‘ra, 48 yoshli Myon Je Van joriy yilning fevral oyida o‘z shogirdi, Kim Xe Nul ismli 8 yoshli qizni sinf xonasiga aldab olib kirib, unga pichoq bilan hujum qilgan.
Bu voqea butun mamlakatda katta shok va g‘azab uyg‘otdi. Prokurorlar o‘lim jazosini talab qilgan bo‘lsa-da, sud ruhiy holatining zaifligi sababli bu talabni rad etdi va uni umrbod qamoq jazosi bilan jazoladi.
Sudda Myon Je Van o‘z aybini tan olib, qilgan ishidan pushaymonligini bildirdi. U jinoyat sodir etilgan paytda ruhiy kasallik bo‘yicha davolanishda ekanini ta’kidladi.
Tergov jarayonida ma’lum bo‘lishicha, u voqeadan oldin ham agressiv xatti-harakatlar qilgan va maktab rahbariyati uni tekshiruvga olgan. Biroq u o‘sha kuni pichoq sotib olib, maktabga olib kirgan va yana bir bolani o‘ldirishni rejalashtirganini tan olgan.
Qizaloq uyiga qaytmagach, ota-onasi politsiyaga murojaat qilgan. Qidiruv natijasida bola maktab binosida pichoqlangan holda topilgan.
Ayblanuvchining bo‘ynida ham jarohat izlari bor edi, politsiya buni o‘z joniga qasd qilishga urinish deb baholadi. Sud qaroriga ko‘ra, Myon Je Van nafaqat umrbod qamoqqa hukm qilindi, balki 30 yil davomida elektron kuzatuv bilaguzuk taqib yurishi majbur qilindi.
Sud bayonotida aytilishicha, “Ayblanuvchi bolalar uchun eng xavfsiz joy bo‘lmog‘i kerak bo‘lgan maktabda o‘z shogirdining hayotini oldi. Bu nafaqat qonunga, balki insonlik tamoyillariga ham zid harakatdir.” Mamlakat rasmiylari hodisadan so‘ng maktablarda xavfsizlik choralarini kuchaytirish, psixologik tekshiruvlarni va o‘qituvchilar uchun ruhiy salomatlik nazoratini majburiy qilish masalalarini muhokama qilmoqda.
Bu voqea Janubiy Koreyada ta’lim tizimidagi psixologik bosim, ruhiy salomatlik va jamoat xavfsizligi haqida jiddiy muhokamalarni kuchaytirdi.
