Tramp va Putin sammiti tayyorgarligi to‘xtatildi
AQSH prezidenti Donald Tramp va Rossiya rahbari Vladimir Putin o‘rtasida Budapeshtda o‘tkazilishi rejalashtirilgan sammitga tayyorgarlik ishlari vaqtincha to‘xtatildi. Bu haqda Zamin.uz xabar berdi.
NBC News muxbiri Garret Haakening Oq uydagi manbasiga ko‘ra, Vashington har ikki tomonning muzokaralarga hali tayyor emasligi haqida fikr bildirgan. Marko Rubio va Sergey Lavrov o‘rtasidagi telefon muloqoti samarali bo‘lishiga qaramay, Tramp muzokaralarni hozircha kechiktirishni ma’qul ko‘rgan.
Oq uy ham prezidentning yaqin orada Putin bilan uchrashishni rejalashtirmayotganini tasdiqladi. CNN manbasi sammitning kechiktirilishiga Rossiyaning juda maksimalistik pozitsiyasi sabab bo‘lganini ma’lum qildi.
Manbalarga ko‘ra, Rubio va Lavrov Ukraina mojarosini hal etishda turlicha qarashlarga ega. Rossiya Tashqi ishlar vazirligi vakili Sergey Ryabkov ham hozirda uchrashuvning aniq vaqti va joyi bo‘yicha kelishuv yo‘qligini bildirdi.
Tramp esa Zelenskiy bilan uchrashuvdan so‘ng Ukrainadagi front holatini o‘z holida saqlash taklifini ilgari surgan edi. Bu taklif Ukraina va Yevropa yetakchilari tomonidan ma’qullangani bilan Moskva uni Tramp va Putinning oldingi kelishuvlariga zid deb baholamoqda.
Lavrovning ta’kidlashicha, Vashingtonning zudlik bilan o‘t ochishni to‘xtatish chaqiriqlari mojaroning asl sabablarini yashirishga urinishdir. U tarix haqiqiy sabablarni unutmasligi kerakligini ta’kidladi.
Shu sababli Budapeshtda o‘tkazilishi rejalashtirilgan yuqori darajadagi sammitning taqdiri hozircha noaniq qolmoqda.
