Yaponiya ilk ayol bosh vazirini kutib oldi
Yaponiyada tarixiy voqea yuz berdi. Bu haqda Zamin.uz xabar berdi.
Sana Takaichi mamlakatning birinchi ayol bosh vaziri etib saylandi. U Tokio shahrida o‘z lavozimini rasman egalladi.
Bu voqea ko‘plab yapon ayollari uchun katta ilhom manbai bo‘ldi, chunki uzoq yillar davomida mamlakat siyosatida erkaklar yetakchilik qilgan. Takaichi o‘zini Buyuk Britaniyaning sobiq bosh vaziri Margaret Tetcherga qiyoslab, "Yaponiyaning temir xonimi" deb nomlanadi.
U bolali oilalarga soliqqa imtiyozlar berish va ish joylarida bolalar bog‘chalari ochishni rag‘batlantirishni taklif qilmoqda. Shu bilan birga, u ayollarning an’anaviy oilaviy rolini saqlab qolishni qo‘llab-quvvatlaydi.
Jahon iqtisodiy forumi hisobotiga ko‘ra, Yaponiya gender tengligi bo‘yicha 148 davlat orasida 118-o‘rinda turadi. Parlament a’zolarining atigi 15,7 foizi ayollardan iborat.
Mamlakatda ayollar ta’limli va malakali bo‘lishiga qaramay, ularning siyosat va biznesdagi ishtiroki hanuz past darajada qolmoqda. Sana Takaichining oldida katta sinovlar turibdi.
U iqtisodiy inqiroz, inflyatsiya va saylovchilarning ishonchini tiklash kabi muammolarni hal qilishi lozim. Uning siyosatida ayollar huquqlari markaziy mavzu bo‘lishi kutilmayapti, ammo u tarixda Yaponiyaning ilk ayol bosh vaziri sifatida qoladi.
Bu voqea mamlakat siyosatida yangi davrning boshlanishi sifatida baholanmoqda.
