Fransiyada parranda grippi bilan bog‘liq vaziyat yana keskinlashdi. Bu haqda Zamin.uz xabar berdi.
Mamlakat qishloq xo‘jaligi vazirligi butun hudud bo‘ylab yuqori ogohlantirish darajasini e’lon qildi. Endilikda barcha parrandachilik fermalari hayvonlarni ochiq havoda emas, faqat yopiq binolarda saqlashlari majburiy hisoblanadi.
Ushbu chora virus tarqalishini oldini olish va sanitariya nazoratini kuchaytirish maqsadida qabul qilindi. So‘nggi yillarda yuqori patogenli parranda grippi Yevropa davlatlaridan tortib Amerikagacha keng yoyilmoqda.
Virus nafaqat yovvoyi qushlarda, balki norka va mushuk kabi sutemizuvchilarda ham aniqlangan. Mutaxassislar virusning odamdan odamga yuqish darajasiga o‘tishi mumkinligidan xavotirda.
Hozircha bunday holatlar qayd etilmagan. Yevropa kasalliklarni profilaktika markazi odamlar uchun xavf darajasi hozircha juda past ekanini ma’lum qildi.
Oxirgi ikki yil ichida Yevropada virusni cheklash maqsadida millionlab qushlar yo‘q qilingan. Masalan, Niderlandiyada o‘tgan hafta parranda grippi aniqlangan fermadan 71 ming qush yo‘q qilindi.
Ispaniyada esa bir necha ehtimoliy o‘choqlar bo‘yicha tezkor choralar ko‘rilmoqda. Fransiya hukumati 2022 yilda boshlangan qush grippiga qarshi emlash dasturi samarali bo‘lganini qayd etdi.
Biroq mutaxassislar hushyorlikni yo‘qotmaslik va virusni nazoratda ushlab turish zarurligini ta’kidlamoqda.
