So‘nggi xalqaro tadqiqot natijalariga ko‘ra, dunyoda eng ko‘p vaqtini kitob o‘qishga sarflaydigan davlatlar ro‘yxati e’lon qilindi. Bu haqda Zamin.uz xabar berdi.
Mutaxassislar o‘qish madaniyati yuqori bo‘lgan mamlakatlarni o‘rganib, yil davomida kitob mutolaasiga ajratilgan soatlarni tahlil qilishdi. Natijalarga ko‘ra, AQSh aholisi yiliga o‘rtacha 357 soat kitob o‘qishga vaqt ajratadi.
Ikkinchi o‘rinda Hindiston (352 soat), uchinchi o‘rinda esa Buyuk Britaniya (343 soat) turadi. Keyingi o‘rinlarda Fransiya (305 soat), Italiya (278 soat), Rossiya (223 soat), Avstraliya (217 soat), Ispaniya va Niderlandiya (har biri 187 soat), shuningdek, Shveysariya (157 soat) joylashgan.
Tadqiqotdan ko‘rinib turibdiki, kitob o‘qishga katta e’tibor qaratadigan jamiyatlarda intellektual salohiyat va ijodiy faollik darajasi ham yuqori bo‘ladi. Shu sababli, o‘qish madaniyatini rivojlantirish va uni keng targ‘ib qilish har bir mamlakat uchun muhim vazifa hisoblanadi.
Kitob o‘qish nafaqat bilimni oshiradi, balki insonning dunyoqarashini kengaytiradi va fikrlash qobiliyatini mustahkamlaydi. Shunday ekan, har bir inson o‘z vaqtini kitob o‘qishga ajratishga harakat qilishi lozim.
