Luvr muzeyidan 88 million yevrolik asarlar o‘g‘irlandi

Fransiyaning Parij shahridagi dunyoga mashhur Luvr muzeyidan o‘g‘irlik sodir bo‘ldi. Bu haqda Zamin.uz xabar berdi.

Bu voqea butun mamlakatni chuqur ta’sir ostiga oldi. Prokuratura va madaniyat vazirligi ushbu hodisani nafaqat moddiy, balki tarixiy yo‘qotish sifatida baholamoqda.

Prokuror Lor Bekko ta’kidlashicha, o‘g‘irlangan buyumlarning umumiy qiymati taxminan 88 million yevroni tashkil etadi. Uning so‘zlariga ko‘ra, bu katta mablag‘ bo‘lsa-da, tarixiy zarar pul bilan o‘lchanmaydi.

Hodisa 19-oktyabr kuni ertalab yuz berdi. O‘g‘rilar mexanik narvon yordamida Luvr muzeyining ikkinchi qavatiga chiqib, derazani ochib, Apollon galereyasiga kirishgan.

Ular qisqa vaqt ichida sakkizta noyob asarni o‘g‘irlab ketishgan. O‘g‘irlangan buyumlar orasida qirollik safir marjoni, zumrad toshli sirg‘alar va Napoleon III ning rafiqasi imperatritsa Yevgeniyaning diademasi mavjud edi.

Hozircha jinoyatchilar qo‘lga olinmagan. Tergov ishlarini uyushgan jinoiy guruhga qarshi olib borilmoqda.

Prokuratura tergov guruhining sonini 60 nafardan 100 nafargacha oshirgani haqida ma’lumot berdi. Maxsus ekspertlarning fikriga ko‘ra, bunday o‘g‘irliklar ko‘pincha asarning madaniy yoki estetik qiymati uchun emas, balki ularni maydalab yoki eritib sotish maqsadida amalga oshiriladi.

Prokuror Bekko ham shunday fikrni tasdiqlab, agar buyumlar yoqib yuborilsa yoki qismlarga bo‘lingan taqdirda, ularning haqiqiy qiymatini qayta tiklash imkoni yo‘qligini aytdi. Tergov ma’lumotlariga ko‘ra, o‘g‘rilar yuk mashinasiga o‘rnatilgan elektr narvonni olib ketish uchun uni “ko‘chirish maqsadida” degan bahona bilan tekshiruvga kelgan shaxsni tahdid ostida chetga surishgan.

Qiziq tomoni shundaki, bu narvonni ijaraga bergan shaxs keyinchalik Parijdan 35 kilometr uzoqlikdagi politsiya bo‘limiga ariza bilan murojaat qilgan. Fransiya madaniyat vazirligi ma’lumotlariga ko‘ra, o‘g‘irlangan buyumlar sug‘urtalanmagan edi.

Bu davlat kolleksiyalari uchun odatiy hol hisoblanadi, chunki sug‘urta narxi juda yuqori. Vazirlik vakillari davlat o‘zi sug‘urtachi rolini bajarishini, bunday asarlarga zarar yetishi holatlari kam uchrashini ta’kidlamoqda.

Parij politsiyasi ushbu jinoyatni mamlakat tarixidagi so‘nggi o‘n yillikdagi eng katta madaniy talafot sifatida baholamoqda. Luvr muzeyi rahbariyati esa o‘g‘irlangan asarlarni vayron qilmaslik va ularni qayta topish umidini yo‘qotmasliklarini bildirdi.