Tunis yaqinida muhojirlar kemasi ag‘darildi, 40 halok
Tunis qirg‘oqlari yaqinida yana bir fojiali dengiz halokati yuz berdi. Bu haqda Zamin.uz xabar berdi.
Mahdiya shahar prokuraturasi vakili Valid Chtabrining ma’lumot berishicha, ag‘darilgan kemada 40 nafardan ortiq afrikalik muhojir halok bo‘lgan. Shuningdek, 30 kishi qutqarib qolindi.
Dastlabki tergov natijalariga ko‘ra, kemada jami 70 kishi bo‘lgan. Topilgan jasadlar orasida go‘daklar ham borligi ma’lum qilindi.
Hozirda qidiruv-qutqaruv ishlari davom etmoqda. So‘nggi yillarda Tunis sohillarida bunday fojialar ko‘payib bormoqda.
2022 yilda ham mamlakat qirg‘oqlari yaqinida muhojirlarni olib ketayotgan to‘rtta qayiq ag‘darilib, kamida 12 kishi halok bo‘lgani, 10 nafari bedarak yo‘qolgani haqida xabarlar tarqalgan edi. O‘sha paytda kemada 120 kishi bo‘lib, 98 nafari qutqarilgan.
Yevropaga yetish maqsadida O‘rta dengiz orqali o‘tishga uringan muhojirlar soni yil sayin oshmoqda. Ular asosan Liviya va Tunis orqali Yevropaga chiqishga harakat qiladi.
Biroq har yili yuzlab odamlar shu dengiz yo‘llarida halok bo‘ladi. Yevropa Ittifoqi 2019 yilda Liviya qirg‘oqlarida qutqaruv operatsiyasini yakunlagan.
Ushbu operatsiya davomida 650 mingdan ortiq muhojir suvdan qutqarilgan. Shunga qaramay, kontrabandachilar va noqonuniy muhojir tashish bilan shug‘ullanuvchi guruhlar faoliyati to‘xtamagan.
Bu esa har yili ko‘plab begunoh insonlarning hayotiga zomin bo‘lmoqda. Muhojirlarning xavfsizligini ta’minlash va noqonuniy tashishni oldini olish uchun xalqaro hamkorlikni kuchaytirish zarur.
