Tramp Putin bilan uchrashuvni bekor qildi
AQSH prezidenti Donald Tramp Rossiya prezidenti Vladimir Putin bilan Budapeshtda o‘tkazilishi rejalashtirilgan uchrashuvni bekor qilganini ma’lum qildi. Bu haqda Zamin.uz xabar berdi.
Bu haqda Oq uyning rasmiy YouTube kanalida e’lon qilingan prezident nutqida aytilgan. Tramp qaror qabul qilishda vaziyatni diqqat bilan baholagani va hozirgi sharoitda uchrashuv o‘tkazish to‘g‘ri emasligini ta’kidlagan.
Uning fikricha, Amerika Qo‘shma Shtatlari Rossiyaga nisbatan qat’iyroq pozitsiyada bo‘lishi zarur. Tramp uchrashuv natija bermasligini sezgani uchun uni bekor qilishga qaror qilganini bildirdi, ammo kelajakda bu uchrashuvni o‘tkazish niyatida ekanligini aytdi.
Shuningdek, u Moskvaga nisbatan bosimni kuchaytirish tarafdori ekanini yashirmadi va Rossiyaga qarshi yangi sanksiyalar joriy etish vaqti kelganini ta’kidladi. Prezident Vladimir Putin ham, Ukraina prezidenti Vladimir Zelenskiy ham mojaroning tinch yo‘l bilan hal qilinishini istayotganini bildirgan.
Tramp urush boshidan beri bu mojaro yuz bermaganida yaxshi bo‘lar edi, deb o‘ylaydi. U har ikki tomonning otishmani to‘xtatib, mavjud chiziqda qolishini va uylariga qaytishini istaydi.
Vashingtonning asosiy maqsadi so‘zsiz tinchlikni ta’minlash va keskinlikni kamaytirishdir. Qurollanish masalasida esa faqat AQSH “Tomahawk” qanotli raketalarini boshqarish texnologiyasiga ega ekanligi aytildi va ularni boshqa davlatlarga berish niyati yo‘qligi bildirildi.
Avvalroq Amerika matbuoti texnik sabablarga ko‘ra Ukrainaga “Tomahawk” raketalarini yetkazib berish kechikayotganini xabar qilgan edi. Tramp Budapesht sammiti haqidagi yakuniy qarorni yaqin ikki kun ichida qabul qilishini aytgan bo‘lsa-da, uchrashuv bekor qilindi.
Shu bilan birga, Vengriya tashqi ishlar vaziri Peter Siyyarto Rossiya va AQSH prezidentlari uchrashuvi albatta bo‘lib o‘tishini, faqat sanasi masala ekanini bildirgan. CNN telekanali manbalariga ko‘ra, Rossiya tashqi ishlar vaziri Sergey Lavrov va AQSH davlat kotibi Marko Rubio o‘rtasidagi suhbatdan so‘ng Vashington Moskvaning pozitsiyasi deyarli o‘zgarmaganini tushungan.
Shu sababli sammit yaqin haftalarda o‘tkazilishi kam ehtimol deb baholanmoqda. RIA Novosti agentligi Oq uy manbalariga tayanib, Tramp maslahatchilar bilan uchrashuv masalasini muhokama qilgani, lekin hozir muzokaralarni davom ettirish uchun vaqt emas degan qarorga kelganini xabar qildi.
Eslatib o‘tamiz, 16-oktyabr kuni Tramp va Putin telefon orqali ikki soat davomida suhbatlashgan edi. Prezident Tramp suhbat samarali o‘tganini aytib, Budapeshtda uchrashuv o‘tkazish niyatini bildirgandi.
Shu bilan birga, AQSH moliya vaziri Skott Bessent prezident muzokaralar jarayonidan hozircha qoniqmaganini ta’kidladi. Tramp esa mojaro yakunlanishiga umid bildirar ekan, bu jarayon bosimsiz, so‘zsiz va kuch ishlatmasdan bo‘lishi kerakligini qayd etdi.
