460 dan ortiq yahudiy olimlardan sanksiya chaqirig‘i
Dunyo bo‘ylab faoliyat yuritayotgan 460 dan ortiq yahudiy olim, siyosatchi va madaniyat arboblari Birlashgan Millatlar Tashkiloti hamda xalqaro hamjamiyatga Isroil hukumati qarshisida qat’iy sanksiyalar joriy etishni so‘rab ochiq murojaat yo‘lladi. Bu haqda Zamin.uz xabar berdi.
Ular Falastinning ishg‘ol qilingan hududlaridagi harakatlarni vijdonsizlik va genotsid deb baholadi. Murojaatda Isroilning G‘azo, G‘arbiy Sohil va Sharqiy Quddusdagi faoliyatlari xalqaro huquq normalarini buzayotganligi ta’kidlandi.
“Bizning falastinliklarga hamdardligimiz yahudiylikka xiyonat emas, aksincha insonparvarlik tamoyillarining ifodasidir. Zulm tugab, ishg‘ol va aparteid siyosati barham topgunga qadar biz tinchlikka erisha olmaymiz”, deyiladi bayonotda.
Imzolar orasida Isroil parlamentining sobiq spikeri Avraam Burg, tinchlik muzokaralari delegatsiyasi sobiq a’zosi Deniyel Levi, rejissyor Jonatan Gleyzer, aktyor Uolles Shon, yozuvchi Maykl Rozen, adiba Naomi Klyayn, shuningdek Pulitser mukofoti sovrindori Benjamin Mozer kabi taniqli shaxslar mavjud. Tadqiqotchilarning ma’lumotlariga ko‘ra, so‘nggi ikki yil davomida davom etayotgan urushda kamida 68 mingdan ortiq falastinlik halok bo‘lgan, ular orasida yuzlab bolalar va ayollar ham bor.
Hatto 10-oktyabrda e’lon qilingan otashkesimdan keyin ham Isroilning hujumlari davom etgani qayd etildi. Birlashgan Millatlar Tashkiloti hisobotlariga ko‘ra, G‘arbiy Sohilda zo‘ravonliklar kuchaygan.
2025-yilda 3200 dan ortiq falastinlik yahudiy posyolkalarining aholisi tomonidan hujumga uchragan. “Save the Children” tashkiloti esa bolalar o‘limining keskin oshganini tasdiqladi.
London universiteti olimlari Isroilning G‘azodagi harakatlarini genotsid darajasiga yetgan urush deb baholadi. Ular XXI asrda biror mojaroda shuncha foiz aholining halok bo‘lmaganini ta’kidladilar.
So‘nggi ikki yil ichida Isroil hukumati xatti-harakatlari hatto yahudiy jamoatchiligi ichida ham keskin tanqid qilinmoqda. “B’Tselem” va “Physicians for Human Rights” tashkilotlari mamlakat bosh vaziri Binyamin Netanyaxu hukumatini genotsidda aybladi.
“The Washington Post” so‘rovida AQShdagi yahudiylarning 61 foizi Isroilning G‘azodagi harakatlarini harbiy jinoyat deb hisoblaydi, 39 foizi esa buni genotsid deb atagan. Mualliflar xalqaro hamjamiyatni Isroilga qarshi sanksiyalar kiritishga, qurol yetkazishni to‘xtatishga va tinchlik jarayonini tiklashga chaqirmoqda.
Ular inson hayotiga hurmat yahudiylikning asosiy qadriyatlaridan biri bo‘lib qolishi kerakligini ta’kidladi.
