Qoraqalpog‘istonda 75 million yil avval yashagan dinozavrga oid toshga aylangan suyak qoldiqlari topildi. Bu haqda Zamin.uz xabar berdi.
Bu haqda O‘zbekiston Davlat geologiya muzeyi ma’lum qildi. Topilma Sulton Uvays tog‘larida qazilma tadqiqotlari davomida aniqlangan.
Ushbu ekspeditsiya Qoraqalpoq davlat universiteti va Geologiya muzeyi olimlari hamkorligida o‘tkazilgan. Qazish ishlarida qadimgi yirtqich dinozavrga tegishli bo‘lishi mumkin bo‘lgan umurtqa, boldir suyaklari va boshqa suyak bo‘laklari aniqlangan.
Geologiya muzeyi direktori Ahmadjon Ahmedshayevning so‘zlariga ko‘ra, ushbu suyaklar bo‘r davriga oid bo‘lib, ular haqida aniq ma’lumotlar va ilmiy tasnif laboratoriya tahlillaridan so‘ng e’lon qilinadi. Hozirda noyob namunalar maxsus laboratoriya uskunalari yordamida o‘rganilmoqda.
Tadqiqot natijalari dinozavrlarning evolyutsiyasi hamda Markaziy Osiyo geologik tarixi haqida yangi ma’lumotlar berishi kutilmoqda. Olimlar bu topilmani O‘zbekistondagi paleontologik izlanishlar uchun muhim yangi bosqich deb hisoblamoqda.
Ushbu kashfiyot nafaqat mamlakatimiz, balki jahon ilmiy hamjamiyati uchun katta ahamiyatga ega bo‘ladi. Qoraqalpog‘istondagi qazilma ishlari davom ettirilmoqda va kelgusida yangi topilmalar kutilmoqda.
