Notemptonda noqonuniy vazn yo‘qotish dorilari zavodi yopildi
Notempton shahrida noqonuniy vazn yo‘qotish dorilarini ishlab chiqaruvchi birinchi zavod aniqlanib, to‘liq yopildi. Bu haqda Zamin.uz xabar berdi.
Ushbu operatsiya Britaniya sog‘liqni saqlash mahsulotlari agentligi tomonidan amalga oshirildi va dunyo miqyosida eng yirik noqonuniy dori musodarasi sifatida qayd etildi. Zavoddan o‘n minglab kimyoviy xomashyo hamda mijozlarga yetkazib berilish arafasida bo‘lgan 2 mingdan ortiq litsenziyasiz Retatrutide va Tirzepatide nomli vazn yo‘qotish dorilari topildi.
Mutaxassislarning ta’kidlashicha, ushbu dorilar sinovdan o‘tmagan, xavfli va inson sog‘lig‘i uchun jiddiy tahdid hisoblanadi. Jinoyatga qarshi kurash bo‘limi rahbari Endi Morlingning so‘zlariga ko‘ra, tarmoqni to‘xtatish orqali minglab odamlarning hayoti xavfdan saqlab qolindi.
U noqonuniy mahsulotlar global bozorda katta daromad keltirayotgan bo‘lsa-da, sog‘liq uchun xavfli ekanligini ta’kidladi. Hukumat vakillari buni “odamlar hayotini xavf ostiga qo‘ygan jinoyatchilarga qarshi muhim g‘alaba” deb baholadi.
Mutaxassislar aholiga internet orqali dori xarid qilishda ehtiyotkorlikni oshirishni, faqat ro‘yxatga olingan dorixonalardan dori olishni tavsiya qilmoqda. Rasmiylar shifokor tavsiyasisiz olingan dorilar sog‘liq uchun katta xavf tug‘dirishini ogohlantirmoqda.
Shuning uchun dori vositalarini faqat malakali mutaxassislar nazorati ostida qabul qilish muhimdir. Odamlar sog‘lig‘ini himoya qilish uchun qonuniy yo‘l bilan tasdiqlangan dori vositalaridan foydalanish zarur.
