Moskva Prokshino hududida ommaviy mushtlashuv yuz berdi
Moskva shahridagi Prokshino turar-joy majmuasida kecha kechqurun katta ommaviy mushtlashuv sodir bo‘ldi. Bu haqda Zamin.uz xabar berdi.
Guvohlarning ma’lum qilishicha, mushtlashuvda o‘nlab odamlar ishtirok etgan va ular belkurak, tayoq hamda yo‘l belgilaridan foydalangan. Hodisa videolarga tushib qolgan va tez orada ijtimoiy tarmoqlarda keng tarqaldi.
Rossiya Ichki ishlar vazirligi vakili Irina Volkning aytishicha, politsiya hodisa joyiga yetib borib, vaziyatni nazorat ostiga oldi. Hozirda taxminan 40 kishi ichki ishlar bo‘limiga olib kelingan.
Ularning kimlari mushtlashuvda bevosita ishtirok etgani aniqlanmoqda. Surishtiruv ishlari davom etmoqda.
Tergov ma’lumotlariga ko‘ra, mojaro natijasida kamida to‘rt kishi turli darajadagi jarohatlar olgan. Shuningdek, janjal vaqtida bir necha to‘xtab turgan avtomobillar ham shikastlangan.
Hozircha mojaroning aniq sabablari noma’lum, ammo dastlabki taxminlarga ko‘ra, kelishmovchilik maishiy yoki qurilish sohasidagi ishchi guruhlar o‘rtasidagi bahs sababli yuzaga kelgan bo‘lishi mumkin. Ichki ishlar vazirligi vakili Irina Volkning bildirishicha, hibsga olingan chet ellik fuqarolarga qamoq jazosi tayinlanmagan.
Ular mamlakatdan deportatsiya qilinadi va kelajakda Rossiya hududiga kirishlari taqiqlanadi. Volkning so‘zlariga ko‘ra, «ozodlikdan mahrum qilish jazosi qo‘llanilmagan fuqarolar belgilangan tartibda Rossiyadan chiqariladi va bu ularning qayta kirishiga to‘siq bo‘ladi».
Huquqni muhofaza qiluvchi organlar mojaro yuzasidan Rossiya Jinoyat kodeksining Bezorilik moddasiga asosan jinoyat ishi ochgan. Ushbu modda bo‘yicha eng yuqori jazo yetti yilgacha ozodlikdan mahrum qilishni nazarda tutadi.
Moskva politsiyasi hozirda barcha ishtirokchilarning shaxsini aniqlash, hodisaning sabablarini va uning tashabbuskorlarini aniqlash bilan shug‘ullanmoqda. Tergov jarayoni davom etmoqda.
