Putinning mashhurligi Rossiyada rekord darajaga yetdi

Rossiyada o‘tkazilgan yangi so‘rovnomaga ko‘ra, Vladimir Putinning mashhurligi so‘nggi yillardagi eng yuqori darajaga yetdi. Bu haqda Zamin.uz xabar berdi.

Rossiya Fanlar akademiyasi huzuridagi Ijtimoiy-siyosiy tadqiqotlar instituti ma’lumotlariga ko‘ra, so‘rov ishtirokchilarining 65 foizi prezident faoliyatini qo‘llab-quvvatlagan. Bu ko‘rsatkich institut tarixidagi rekord natija hisoblanadi.

2000 yilda faqat 12 foiz rossiyaliklar Putinni mamlakat uchun foydali deb hisoblagan bo‘lsa, 2018 yilda bu raqam 54 foizga yetgan. Ukrainadagi urush boshlanganidan so‘ng qo‘llab-quvvatlash darajasi yana oshib, 60 foizdan yuqori bo‘lgan.

So‘rovda ikkinchi o‘rinni Iosif Stalin egallagan. Uning faoliyatini respondentlarning 45 foizi ijobiy baholagan.

Sovet davri rahbarining reytingi so‘nggi o‘ttiz yil ichida eng yuqori ko‘rsatkichga erishdi. 2016 yilda bu raqam 31 foiz, 2022 yilda 40 foiz, 2025 yilda esa 45 foizni tashkil etdi.

Shuningdek, Nikolay II va Leonid Brejnev haqida ijobiy fikr bildirganlar soni ham oshgani qayd etilgan. Nikolay II ni 16 foiz, Brejnevni esa 24 foiz respondent ijobiy baholagan.

Eng salbiy baholar Mixail Gorbachyov va Boris Yelsinga berilgan. Rossiyaliklarning 59 foizi Gorbachyovni, 56 foizi esa Yelsinni mamlakat tarixidagi eng zararli rahbarlar sifatida ko‘rsatgan.

Bu natijalar Rossiya jamiyatida tarixiy shaxslar haqidagi fikrlarning o‘zgarayotganini ko‘rsatmoqda.