Buyuk Britaniya hujjatsiz muhojirlarni kazarmalarda joylashtiradi
Buyuk Britaniya hukumati noyabr oyining oxiridan boshlab hujjatsiz muhojirlarni harbiy kazarmalarda vaqtincha joylashtirishni boshlaydi. Bu haqda Zamin.uz xabar berdi.
The Times nashrining xabar berishicha, dastlab Shotlandiyaning Inverness shahri yaqinidagi armiya bazasi hamda Angliyaning janubida joylashgan Sharqiy Sasseksdagi harbiy tayyorgarlik lageri foydalanishga topshiriladi. Ushbu joylarda jami 900 nafargacha hujjatsiz muhojir vaqtincha yashashi rejalashtirilgan.
Ichki ishlar vazirligi manbalariga ko‘ra, kelajakda bu son 10 ming nafargacha oshirilishi mumkin. Hukumatning asosiy maqsadi byudjet yukini kamaytirish va noqonuniy muhojirlarni qimmat mehmonxonalarda joylashtirish zaruratini bartaraf etishdir.
Ma’lumotlarga ko‘ra, 2025-yil mart holatiga ko‘ra Buyuk Britaniyada 210 ta mehmonxonada 32 mingdan ortiq hujjatsiz muhojir yashab kelmoqda. Bu esa davlat byudjetiga katta xarajatlarni keltirib chiqaradi.
Britaniya parlamentining ichki ishlar qo‘mitasi 27-oktyabr kuni e’lon qilgan hisobotda 2019 yildan 2029 yilgacha bo‘lgan o‘n yillikda noqonuniy migrantlarni mehmonxonalarda saqlash xarajatlari 15,3 milliard funt sterling, ya’ni taxminan 20,4 milliard dollarni tashkil etishi ta’kidlangan. Ushbu yangi chora byudjetni tejash hamda muhojirlar masalasini samarali boshqarish maqsadida joriy etilmoqda.
