Janubiy Koreyada o‘zbekistonlik talaba terrorga pul o‘tkazdi
Janubiy Koreyada 29 yoshli o‘zbekistonlik talaba hibsga olindi. Bu haqda Zamin.uz xabar berdi.
Chosun nashrining xabar berishicha, ushbu shaxs Afrikada quduqlar qurish uchun tashkil etilgan xayriya loyihasi nomi ostida mablag‘ to‘plab, uning bir qismini HAMAS va Al-Qoida bilan bog‘liq guruhlarga o‘tkazgan. Gumondor ijtimoiy tarmoqlarda soxta sahifalar yaratib, ekstremistik mazmundagi postlar va urushga chaqiriqlarni tarqatgan.
Mablag‘ yig‘ish ikki usulda amalga oshirilgan: kriptovalyuta orqali hamda o‘zbekistonliklar uchun tashkil etilgan futbol klubi orqali naqd pul shaklida. Hozirda unga o‘n yilgacha ozodlikdan mahrum qilish va katta miqdorda jarima jazosi qo‘llanishi mumkin.
Tergov davom etmoqda, politsiya talabaga yordam bergan boshqa shaxslar bor-yo‘qligini, shuningdek, yig‘ilgan mablag‘ning yana qayerlarga yo‘naltirilganini aniqlashga harakat qilmoqda. Ushbu holat mamlakatimiz fuqarolari uchun jiddiy ogohlantirish bo‘lib xizmat qiladi.
Huquqni muhofaza qiluvchi organlar bunday jinoyatlarga qarshi qat’iy kurash olib borishini ta’kidlamoqda. Jamiyatimiz tinchligi va xavfsizligini ta’minlashda har bir fuqaroning mas’uliyati katta ekanligi eslatiladi.
