Oliy Majlis Qonunchilik palatasi deputatlari O‘zbekiston, Qirg‘iziston va Tojikiston davlat chegaralari uchrashuv nuqtasi haqidagi shartnomani ratifikatsiya qilish to‘g‘risidagi qonun loyihasini ma’qulladi. Bu haqda Zamin.uz xabar berdi.
Ushbu hujjat Senatga yuborildi. Shartnoma 2025-yil 31-mart kuni Xo‘jand shahrida uch davlat rahbarlari uchrashuvi davomida imzolangan.
Hujjatda O‘zbekiston, Qirg‘iziston va Tojikiston davlat chegaralari tutashadigan aniq nuqta belgilangan hamda ushbu hududdagi chegaralar chizig‘i tasvirlangan. Deputatlar fikricha, shartnomaning qabul qilinishi qo‘shnichilik munosabatlarini mustahkamlash, o‘zaro ishonchni oshirish va uch davlat o‘rtasidagi strategik sheriklikni rivojlantirishga xizmat qiladi.
Bundan tashqari, hujjat chegaradosh hududlarda yashovchi aholi o‘rtasidagi aloqalarni kuchaytirish, savdo-sotiqni rivojlantirish, qo‘shma infratuzilmaviy loyihalarni amalga oshirish hamda yangi ish o‘rinlarini yaratish uchun huquqiy asos bo‘ladi. Ushbu shartnoma mintaqaviy barqarorlik va hamkorlikni yanada mustahkamlashga xizmat qiladi.
