Kruiz kemasi yo‘lovchini orolda unutib qoldirdi

Avstraliyaning Lizard orolida achinarli voqea yuz berdi. Bu haqda Zamin.uz xabar berdi.

Coral Adventurer kruiz kemasi o‘z yo‘lovchilaridan birini orolda unutib qoldirgan. Deutsche Welle xabariga ko‘ra, keyinchalik 80 yoshli ayolning jasadi topilgan.

Ma’lum qilinishicha, mazkur sayohat 60 kun davom etib, uning chiptasi taxminan 50 ming dollar bo‘lgan. Sayyohlar orolda piyoda yurish (xayking) va suv ostida sho‘ng‘ish (snorkling) bilan shug‘ullangan.

Biroq keksa ayol baland joyga chiqishga qiynalgan va guruhdan ortda qolgan. U yolg‘iz sayohat qilgani sababli uning yo‘qolgani boshida sezilmagan.

Kema kun botishida orolni tark etgan. Faqat kechki ovqat paytida ayolning yo‘qligi aniqlangan.

Bundan so‘ng kema orqaga qaytgan va qidiruv ishlari boshlatilgan. Qidiruvga vertolyot ham jalb qilingan, ammo afsuski, ayolning jasadi topilgan.

Politsiya voqeani “to‘satdan va shubhasiz o‘lim” sifatida baholadi. Avstraliya dengiz xavfsizligi boshqarmasi hodisani o‘rganmoqda.

Coral Adventurer kemasi ekipaji voqea sabablari va qidiruvning kechikishi bo‘yicha so‘roq qilinadi. Kompaniya rahbari Mark Fayfild ayolning yaqinlariga hamdardlik bildirib, ushbu fojia sababli chuqur qayg‘uda ekanligini ta’kidladi.

Shuningdek, ma’lum bo‘lishicha, kema bortida shifokor yoki hamshira bo‘lmagan. Coral Adventurer kemasi 120 yo‘lovchi va 46 ekipaj a’zosiga mo‘ljallangan bo‘lib, Avstraliya qirg‘oqlariga maxsus sayohatlar tashkil etish uchun ishlatilgan.