Firibgarlar nafaqaxo‘r ayoldan 350 ming dollar undirdi
Janubiy Koreyaning Miryan shahrida yashovchi nafaqaxo‘r ayol firibgarlar qurboniga aylandi. Bu haqda Zamin.uz xabar berdi.
Ular o‘zlarini mashhur "Kalmar o‘yini" seriali yulduzi Li Jong Je deb tanishtirib, ayolni aldashgan. Firibgarlar sun’iy intellekt orqali yaratilgan tasvirlardan foydalanib, ayolni haqiqiy aktyor bilan muloqot qilayotganiga ishontirishgan va undan katta miqdorda pul undirishgan.
Bu haqda ChosunBiz EN xabar berdi. Firibgarlar dastlab ayolga ijtimoiy tarmoqlar orqali murojaat qilishgan.
Ular o‘zlarini aktyor sifatida tanishtirib, ayol bilan suhbatni KakaoTalk messenjeri orqali davom ettirishgan. Muloqot davomida "aktyor" ayolga iliq so‘zlar bilan murojaat qilib, unga yaqinlik illyuziyasini hosil qilgan.
Ayol aktyorga ishonib, unga katta miqdorda pul o‘tkaza boshlagan. Firibgar unga Koreyaga qaytgach, mablag‘larni qaytarishini va’da qilgan.
Firibgarlar sun’iy intellekt yordamida shaxsiy guvohnoma va haydovchilik guvohnomasining soxta fotosuratlarini yaratib, ayolning ishonchini oshirishgan. Ular turli sabablarni o‘ylab topib, ayoldan pul talab qilishgan, masalan, chet el aeroportida qolib ketish yoki boshqa moliyaviy muammolarni bahona qilishgan.
Ayol hatto aktyor bilan uchrashish uchun VIP-chiptaga 7,5 ming dollar o‘tkazgan, ammo bu uchrashuv amalga oshmagan. Firibgarlarning talablari kuchayib, ayoldan undirilgan mablag‘ 350 ming dollardan oshganida, u nihoyat politsiyaga murojaat qilishga qaror qilgan.
Kensan-Namdo provinsiyasi politsiyasi mazkur ishni tergov qilayotganini tasdiqladi. Biroq, ayol yo‘qotilgan mablag‘larni qaytarib olish imkoniyati juda past ekanini ta’kidlashmoqda.
