Xitoyda blogerlar uchun malaka talabi joriy etildi

Xitoyda blogerlik faoliyatini tartibga soluvchi yangi qonun kuchga kirdi. Bu haqda Zamin.uz xabar berdi.

Ushbu qonunga ko‘ra, 2025-yil 25-oktyabrdan boshlab tibbiyot, huquq, ta’lim va moliya kabi maxsus bilim talab qiladigan sohalarda kontent yaratadigan blogerlar tegishli malaka hujjatlarini taqdim etishi majburiy bo‘ladi. Endilikda bu yo‘nalishlarda faoliyat yurituvchi blogerlar diplom, litsenziya yoki sertifikatga ega bo‘lishlari shart.

Mazkur tartib Xitoyning Kibermakon ma’muriyati (CAC) tomonidan ishlab chiqilgan bo‘lib, Douyin, Bilibili va Weibo kabi mashhur platformalarda amalga joriy etildi. Shuningdek, blogerlar o‘z kontentida foydalanilgan manbalar va tadqiqotlarni aniq ko‘rsatishga majbur bo‘ladilar.

Rasmiylarning ta’kidlashicha, ushbu chora onlayn dezinformatsiya va noto‘g‘ri maslahatlarning oldini olishga qaratilgan. Biroq ayrim tanqidchilar yangi talablar ijodkorlik va so‘z erkinligiga salbiy ta’sir ko‘rsatishi mumkinligini qayd etmoqda.

Mutaxassislar esa bu islohotni Xitoyning internet maydonida ishonchli ma’lumot tarqatishni ta’minlashga qaratilgan yangi siyosat bosqichi sifatida baholamoqda.