AQSh prezidenti Donald Tramp mamlakatda 30 yildan so‘ng yadro qurollarini sinovdan o‘tkazishni qayta yo‘lga qo‘yishga qaror qildi. Bu haqda Zamin.uz xabar berdi.
U bu qarorni Rossiya va Xitoy kabi davlatlarning yadro qurollarini sinovdan o‘tkazishni davom ettirayotgani bilan izohladi. Trampning so‘zlariga ko‘ra, bu chora AQShning mudofaa qudratini saqlash va raqobatchilardan ortda qolmaslik uchun zarur.
Prezident ijtimoiy tarmoqlarda o‘z bayonotini e’lon qilib, “boshqa davlatlar yadro qurollarini sinovdan o‘tkazayotgan bir paytda, biz ham teng asosda sinovlarni boshlaymiz”, deya ta’kidladi. Ushbu bayonot Xitoy rahbari Si Szinpin bilan Janubiy Koreyada bo‘lib o‘tadigan uchrashuv arafasida e’lon qilindi.
Ma’lum bo‘lishicha, AQSh oxirgi marta 1992-yilda Nevada shtatida yadro qurolini sinovdan o‘tkazgan edi. Trampning qarori AQShning yadro siyosatida yangi bosqichni boshlab beradi.
Nevada shtatidagi sinov maydoni hozirgacha hukumat tasarrufida saqlangan. Mutaxassislarning fikricha, zarurat tug‘ilsa, bu hudud yana sinovlar uchun tayyor holatga keltirilishi mumkin.
Tramp esa bu jarayonni tezroq boshlash kerakligini alohida ta’kidladi.
