Luvr muzeyi xavfsizlik tizimida jiddiy kamchiliklar aniqlandi

Luvr muzeyi xavfsizlik tizimi bilan ishonchli himoyalangani haqida ilgari berilgan bayonotlarga qaramay, yaqinda uning ichki xavfsizlik tizimida jiddiy kamchiliklar mavjud ekani aniqlandi. Bu haqda Zamin.uz xabar berdi.

"Liberation" nashri xabariga ko‘ra, muzey videokuzatuv tizimlari zaif parollar bilan himoyalangan, dasturiy ta’minoti esa operatsion tizimning juda eski versiyalarida ishlagan. Mutaxassislar muzey xavfsizligi bo‘yicha o‘tkazilgan tekshiruvlar natijasida qoidabuzarliklarni aniqladi.

19-oktyabr kuni Fransiya madaniyat vaziri Rashida Dati muzeydagi o‘g‘irlik holati yuzasidan bayonot berib, xavfsizlik tizimlari muvaffaqiyatsizlikka uchramaganini ta’kidladi. Ammo bir necha kundan keyin bu bayonotga o‘zgartirish kiritilib, tizimda kamchiliklar borligi rasman tan olindi.

Vazirlik bu muammolarni bartaraf etish uchun tezkor choralar ko‘rish zarurligini ta’kidladi. Aniqlanishicha, muzey ma’lumotlari oddiy parollar bilan himoyalangan va eskirgan dasturiy ta’minotda saqlangan.

Ushbu dasturiy ta’minot Windows Server 2003 asosida ishlagan va ishlab chiquvchi tomonidan qo‘llab-quvvatlanmay kelgan. Eng ajablanarlisi, xavfsizlik qoidalarining buzilishi va IT tizimidagi xatolar bir necha yil avval ham ma’lum bo‘lgan.

Biroq, rahbariyat ushbu muammolarni bartaraf etish bo‘yicha samarali choralar ko‘rmagan. Bu holat muzey xavfsizligini ta’minlashdagi jiddiy e’tiborsizlikni ko‘rsatadi.