Sankt-Peterburgda migrant kurerlar uchun cheklovlar joriy qilindi
3-noyabrdan boshlab Sankt-Peterburg shahrida yetkazib berish sohasida ishlayotgan ayrim migrantlar uchun yangi cheklovlar kuchga kirdi. Bu haqda Zamin.uz xabar berdi.
Bu haqda "Argumenti i fakti" nashri xabar berdi. Ma’lumotlarga ko‘ra, "Samokat" va "Yandeks Yeda" kabi yirik yetkazib berish xizmatlari xorijiy fuqarolar uchun smenaga chiqish va buyurtmalarni qabul qilish imkoniyatini to‘xtatgan.
Cheklov Ozarboyjon, O‘zbekiston, Tojikiston, Moldova va Ukraina fuqarolariga taalluqli. Biroq Yevroosiyo iqtisodiy ittifoqiga (YEOII) a’zo davlatlar fuqarolari bundan mustasno bo‘lib, ular avvalgidek patentsiz ishlash huquqiga ega bo‘ladilar.
Mazkur qaror ilk bor avgust oyida Sankt-Peterburg gubernatori Aleksandr Beglov tomonidan imzolangan edi. Unga ko‘ra, shaharda migrantlarning kurerlik va taksi xizmatlarida ishlashi cheklanadi.
Shuningdek, kompaniyalarga kadrlar siyosatini va ichki tizimni qayta ko‘rib chiqish uchun uch oy muddat berilgan edi. Shahar ma’muriyati ushbu chorani yashirin bandlikni kamaytirish, xizmatlar sifatini va xavfsizligini oshirish, shuningdek, mahalliy aholi, ayniqsa talabalar va yoshlar uchun qo‘shimcha ish o‘rinlari yaratish maqsadida joriy etganini ma’lum qildi.
Mutaxassislarning fikriga ko‘ra, yangi qoidalar migrantlar oqimini qisqartirishi mumkin, ammo bu yetishmayotgan kadrlar muammosini yanada kuchaytiradi. Chunki kurerlik sohasi Sankt-Peterburgdagi tez rivojlanayotgan xizmatlar tarmog‘ining muhim qismi hisoblanadi.
Shu bilan birga, mahalliy rasmiylar bu cheklov vaqtinchalik ekanini va yangi ish tizimi muvaffaqiyatli yo‘lga qo‘yilgandan so‘ng shartlar qayta ko‘rib chiqilishi mumkinligini qayd etmoqda.
