Rossiya yadro sinovlarini qayta boshlashni ko‘rib chiqmoqda

Rossiya Mudofaa vaziri Andrey Belousov yaqinda Xavfsizlik Kengashi yig‘ilishida prezident Vladimir Putinga Novaya Zemlya arxipelagida yadro qurollarini sinash bo‘yicha ishlarni qayta yo‘lga qo‘yishni taklif qildi. Bu haqda Zamin.uz xabar berdi.

Ushbu ma’lumot Kreml matbuot xizmati tomonidan e’lon qilindi. Belousovning ta’kidlashicha, AQSH so‘nggi yillarda xalqaro qurollarni qisqartirish va nazorat qilish bo‘yicha kelishuvlardan bosqichma-bosqich chiqib ketmoqda.

Unga ko‘ra, Vashington strategik hujum qurollarini modernizatsiya qilmoqda, bu esa Rossiya uchun yangi harbiy tahdidlarni yuzaga keltirmoqda. "Bu harakatlar mamlakatimiz xavfsizligiga jiddiy tahdid soladi.

Shuning uchun biz yadro salohiyatimizni har qanday sharoitda tayyor holda ushlab turishimiz va zarurat tug‘ilganda munosib javob bera olishimiz kerak. Shu sababdan yadro sinovlariga tayyorgarlikni boshlash maqsadga muvofiq", – dedi Belousov.

Prezident Vladimir Putin ushbu taklifga ehtiyotkorona munosabat bildirdi. U hozircha bu masalada aniq qaror qabul qilmaganini aytib, Tashqi ishlar vazirligi, Mudofaa vazirligi va maxsus xizmatlarga AQSHning yadroviy faoliyati haqida qo‘shimcha ma’lumot yig‘ish hamda ehtimoliy chora-tadbirlar bo‘yicha takliflar tayyorlashni buyurdi.

Ma’lumotlarga ko‘ra, Novaya Zemlya poligonida oxirgi yadro sinovi 1990-yil 24-oktyabrda o‘tkazilgan. Oradan ko‘p o‘tmay, Rossiya hukumati bunday sinovlarga moratoriy e’lon qilgan va 1996-yilda Moskva hamda Vashington Yadro sinovlarini yalpi taqiqlash to‘g‘risidagi shartnomani imzolagan.

Ammo ushbu hujjatni ikki davlat ham ratifikatsiya qilmagan. So‘nggi oylarda Rossiya va AQSH o‘rtasida yadro qurollari bo‘yicha tortishuv kuchaymoqda.

2025-yil 26-oktyabrda Vladimir Putin "Burevestnik" qanotli raketasi va "Poseydon" uchuvchisiz suvosti apparati muvaffaqiyatli sinovdan o‘tkazilganini e’lon qildi. Har ikki tizim yadroviy energiya qurilmalari bilan jihozlangan.

AQSH prezidenti Donald Tramp esa bu jarayonga javoban, Amerika ham yadroviy qurollarni sinovdan o‘tkazishga tayyorgarlik ko‘rayotganini ma’lum qildi. Xalqaro ekspertlar bu holatni yangi "sovuq urush"ning boshlanishi sifatida ko‘rmoqda.