Kinoteatrda 32 kishi ko‘z kuyishi bilan shifoxonaga tushdi
Abakan shahridagi "Nautilus" kinoteatrida film tomosha qilayotgan 32 nafar kishining ko‘zlari kuygan. Bu haqda Zamin.uz xabar berdi.
Bu haqda Krasnoyarsk o‘lkasi va Xakasiya bo‘yicha Tergov qo‘mitasi ma’lumot berdi. Hodisa 3-noyabr kuni tushdan keyin kichik teatr zalida sodir bo‘lgan.
Jabrlanganlar "Dadaning qizlari. Onam qaytib keldi" filmini tomosha qilish vaqtida zarar ko‘rishgan.
Telegramdagi Baza kanali xabariga ko‘ra, hodisa seans davomida yoqib qo‘yilgan bakteritsid lampa tufayli yuzaga kelgan. Tergov qo‘mitasining ma’lum qilishicha, kinoteatrga tashrif buyurgan 32 nafar kishi, jumladan, 20 nafar voyaga yetmagan bola shifoxonaga murojaat qilgan.
Ularning ko‘zlari kuyishga uchragan. Mazkur holat bo‘yicha tergov ishlari olib borilmoqda.
Xizmat ko‘rsatish jarayonida iste’molchilarning hayoti va sog‘lig‘i xavfsizligi talablariga rioya etilmaganligi sababli jinoiy ish qo‘zg‘atilgan.
