Fransiyada 77 yoshli velosipedchi 40 metr chuqurlikdagi jarlikka tushib ketdi va uch kun davomida u yerda qolib ketdi. Bu haqda Zamin.uz xabar berdi.
Ushbu voqea haqida mahalliy matbuot xabar berdi. Qariya do‘kondan velosipedda uyiga qaytayotgan paytda Fransiya janubidagi daraga yiqilib tushgan.
U jarlikdan chiqishga bir necha marta urinib ko‘rgan, ammo muvaffaqiyatsizlikka uchragan. Velosipedchi har safar tepada ovoz eshitganda yordam so‘rab chaqirgan, lekin dastlab yordam yetib kelmagan.
Uning omon qolishiga oziq-ovqat solingan sumkasi va bir necha shisha vino yordam bergan. Qizig‘i, bu shishalar sinmagan va qariyaga uch kun davomida oziq-ovqat manbai bo‘lgan.
Uch kundan so‘ng yo‘l ishchilari jarlik atrofida velosiped ramasini ko‘rib qolgan va zudlik bilan qutqaruvchilarni chaqirishgan. O‘t o‘chirish xizmati xodimlari velosipedchini xavfsiz holatda qutqarib olishdi.
Shifoxonada o‘tkazilgan tekshiruvlar uning faqat yengil jarohatlar olganini va sovuq qotishdan boshqa jiddiy muammolar yo‘qligini ko‘rsatdi. Shifokorlar bu holatni "mo‘jiza" deb atashdi va erkakning jasoratini e’tirof etishdi.
Shifokorlardan biri hazilomuz tarzda: "U chindan ham sindirish qiyin yong‘oq", deb ta’kidladi.
