Nyu-York meri milliy ozchiliklarga minnatdorchilik bildirdi
Nyu-York shahri meri Zoxran Mamdani saylovlarda erishgan g‘alabasidan so‘ng, o‘z tarafdorlari oldida nutq so‘zladi. Bu haqda Zamin.uz xabar berdi.
U o‘z chiqishida g‘alabaga erishishda qo‘llab-quvvatlagan barcha guruhlarga, jumladan, o‘zbekistonlik hamshiralarga minnatdorchilik bildirdi. Shuningdek, Meksika buvijonlari, Yaman savdogarlari, Senegal taksistlari va shaharda yashovchi boshqa milliy ozchilik vakillariga ham o‘z tashakkurini izhor etdi.
“Bu shahar sizniki, bu demokratiya ham sizniki”, — dedi Mamdani. U o‘zining yangi siyosiy dasturida bir qator ijtimoiy tashabbuslarni ilgari surdi.
Jumladan, olti haftadan besh yoshgacha bo‘lgan bolalar uchun bepul parvarish xizmatlarini yo‘lga qo‘yish va shaharning har bir hududida davlat tomonidan subsidiyalanuvchi oziq-ovqat do‘konlarini ochish takliflarini bildirdi. Shuningdek, Mamdanining rejalarida shahar avtobuslarini bepul qilish, bir million ijarachilar uchun ijara narxlarini muzlatish kabi loyihalar ham mavjud.
U shaharning eng boy qatlamidan yuqori soliq undirish va korporativ soliq stavkalarini oshirish orqali ushbu mablag‘larni ijtimoiy loyihalarga yo‘naltirishni rejalashtirmoqda. Biroq, tanqidchilar uning bu rejalarini amalga oshirishni qiyin va real emas deb hisoblamoqda.
