O‘zbekiston va Afg‘oniston o‘rtasida Afg‘oniston hududida to‘qimachilik sanoatini tiklash bo‘yicha qo‘shma loyiha amalga oshirilmoqda. Bu haqda Zamin.uz xabar berdi.
Ushbu dastur doirasida O‘zbekistonda faoliyatini to‘xtatgan ayrim to‘qimachilik korxonalarining ishlab chiqarish quvvatlarini Afg‘onistonga ko‘chirish imkoniyatlari o‘rganilmoqda. Hamkorlikning huquqiy asosini O‘zbekiston Savdo-sanoat palatasi va Afg‘onistonning “Afghan Textile Corporation” davlat korxonasi o‘rtasida imzolangan memorandum tashkil etadi.
Oktabr oyida o‘zbek mutaxassislari delegatsiyasi Afg‘onistonning Parvon, Qandahor, Balx va Bag‘lon viloyatlaridagi fabrikalar hamda Kobuldagi tikuv tsexlarini texnik auditdan o‘tkazdi. Tashrif davomida binolar, uskunalar va infratuzilmaning hozirgi holati baholanib, texnik-iqtisodiy ma’lumotlar yig‘ildi.
Ushbu ma’lumotlar fabrikalarni qayta tiklash va ishga tushirish bo‘yicha takliflarni ishlab chiqish uchun asos bo‘ladi. Mazkur tashabbus yangi ish o‘rinlarini yaratish va ikki davlat o‘rtasidagi iqtisodiy aloqalarni mustahkamlashga xizmat qilishi kutilmoqda.
Bu jarayon O‘zbekiston va Afg‘oniston o‘rtasidagi hamkorlikni yanada chuqurlashtirishga qaratilgan kengroq sa’y-harakatlar doirasida amalga oshirilmoqda. Shuningdek, yaqinda Kobulda ikki mamlakat kompaniyalari ishtirokida tashkil etilgan qo‘shma logistika korxonasi bu hamkorlikning amaliy natijalaridan biri sifatida e’tirof etilmoqda.
