Filippinda "Kalmegi" tayfuni: 66 kishi halok bo‘ldi
2025-yil 5-noyabr kuni Filippinning markaziy hududlariga "Kalmegi" tayfuni urilishi oqibatida kamida 66 kishi hayotdan ko‘z yumdi, 400 mingdan ortiq odam xavfsiz joylarga ko‘chirildi. Bu haqda Zamin.uz xabar berdi.
BBC xabariga ko‘ra, eng ko‘p zarar Sebu orolida kuzatilgan. Ushbu hududda butun qishloqlar suv ostida qolgan.
Hozirda 26 kishi bedarak yo‘qolgan deb e’lon qilindi. Qurbonlarning asosiy qismi suv toshqini paytida halok bo‘lgan.
Sebu provinsiyasida favqulodda holat e’lon qilindi. Tayfun davomida shamol tezligi soatiga 130 kilometrga yetgan.
Bu esa uylarning vayron bo‘lishiga, yo‘llarning avtomobillar va binolar qoldiqlari bilan to‘lib ketishiga olib kelgan. Qutqaruv ishlari davomida harbiylar aviatsiyani ham jalb qilishdi.
Biroq, bir vertolyot halokatga uchrab, undagi olti nafar ekipaj a’zosi halok bo‘ldi. Mahalliy aholining aytishicha, suv darajasi kutilmaganda tez ko‘tarilgan.
Mandaue shahri aholisi: "Uyimiz loy bilan to‘lib ketgan, qayerdan tozalashni boshlashni bilmayapmiz", deb izhor qilishgan. Hozirda tayfun kuchsizlanib, Janubiy Xitoy dengizi tomon harakatlanmoqda.
Yaqin kunlarda uning Vyetnamga yetib borishi kutilmoqda.
