AQSh senatorlari Markaziy Osiyo bilan savdoni kengaytirishni taklif qildi
Vashington shahrida "C5+1" formatidagi sammitga bag‘ishlangan qabul marosimi bo‘lib o‘tdi. Bu haqda Zamin.uz xabar berdi.
Ushbu tadbirda AQSh Senatining nufuzli a’zosi Jim Rish o‘z hamkasbi Stiv Deyns bilan birgalikda Markaziy Osiyo davlatlari tashqi ishlar vazirlariga Jekson-Venik tuzatmasini bekor qilish bo‘yicha qonun loyihasini taqdim etdi. Jekson-Venik tuzatmasi 1974-yilda AQShda qabul qilingan bo‘lib, emigratsiya erkinligini cheklagan davlatlarga savdo imtiyozlarini taqiqlashni ko‘zda tutgan edi.
Ushbu qonun asosan sobiq Sovet Ittifoqi davlatlariga qaratilgan. Markaziy Osiyo davlatlari mustaqillikka erishganiga 30 yildan oshgan bo‘lsa-da, bu cheklovlar hali ham mintaqada savdo va investitsiya imkoniyatlarini cheklab kelmoqda.
Senator Rishning fikriga ko‘ra, tuzatmani bekor qilish Qo‘shma Shtatlar va Markaziy Osiyo o‘rtasidagi iqtisodiy hamkorlikni kengaytiradi hamda strategik manfaatlarga asoslangan sheriklikni rivojlantirishga xizmat qiladi. U mintaqaning murakkab geosiyosiy holatini eslatib, Markaziy Osiyo davlatlari kuchayib borayotgan Xitoy va barqarorlikka tahdid solayotgan Rossiya o‘rtasida joylashganini ta’kidladi.
Shuningdek, senator AQShning ishonchli sherik sifatida mintaqaga ta’sirini kuchaytirishi va Markaziy Osiyo davlatlariga o‘z mustaqil kelajagini belgilashda yordam berishini qayd etdi. "C5+1" diplomatik platformasining o‘n yilligida yangi hamkorlik davrini boshlash ayni muddao ekanini ham ta’kidladi.
Ushbu tashabbus nafaqat AQShning iqtisodiy manfaatlariga xizmat qiladi, balki amerikalik kompaniyalar uchun yangi bozorlar ochadi. Senatorning so‘zlariga ko‘ra, chuqurroq savdo aloqalari mintaqaviy barqarorlikni mustahkamlash va Markaziy Osiyo davlatlariga iqtisodiy imkoniyatlarni kengaytirishda muhim ahamiyat kasb etadi.
