Italiyaning Nova axborot agentligi muxbiri Gabriele Nunsiati Yevropa komissiyasining matbuot anjumanida G‘azo bo‘yicha savol berganidan so‘ng ishdan bo‘shatildi. Bu haqda Zamin.uz xabar berdi.
Ushbu voqea 13-oktyabr kuni Bryusselda bo‘lib o‘tgan brifingda yuz berdi. Jurnalist Nunsiati Yevrokomissiya rasmiylaridan urushdan keyingi G‘azoni qayta tiklash uchun tovon to‘lash masalasini ko‘tarib, Yevropa Ittifoqining Rossiyadan Ukraina uchun tovon talab qilayotganini eslatgan.
U shuningdek, “Bu tamoyil Isroilga ham tegishlimi?” degan savolni bergan. Ammo Yevrokomissiya vakili Paola Pigno bu savolga javob berishni rad etgan.
Oradan bir necha kun o‘tib, Yevroparlament a’zosi Gaetano Pedulla jurnalistning ishdan bo‘shatilganini ma’lum qildi. Nunsiati bu xabarni Anadolu agentligiga tasdiqlagan bo‘lsa-da, tafsilotlarni oshkor etishni istamagan.
Yevropa komissiyasi rahbari Ursula fon der Lyayen ilgari ham Isroilni ochiq qo‘llab-quvvatlagani uchun tanqidga uchragan edi. Ushbu voqea esa Yevropa matbuot erkinligi bo‘yicha yangi muhokamalarga sabab bo‘ldi.
Matbuot erkinligi va jurnalistlarning mustaqil faoliyat yuritishi borasidagi masalalar yana kun tartibiga chiqdi.
