O‘zbekiston Afg‘onistonning yangi meva va sabzavotlarini eksport qilish uchun havo yo‘lagini ochdi. Bu haqda Zamin.uz xabar berdi.
Bu haqda Atlas Press xabar bermoqda. Mazkur havo yo‘lagi Surxondaryo viloyati va Afg‘onistonning Balx viloyati rasmiylari o‘rtasida erishilgan kelishuv asosida tashkil etilgan.
Ushbu yangi marshrut afg‘on tadbirkorlariga o‘z mahsulotlarini Rossiya, Xitoy va Hindiston kabi yirik xalqaro bozorlarga yetkazish imkonini taqdim etadi. O‘zbekiston tomoni afg‘on eksportchilariga yuklarni tashishda amaliy yordam ko‘rsatishga tayyor ekanini ma’lum qilgan.
Shuningdek, mutaxassislar ta’kidlaganidek, Pokiston chegarasidagi o‘tish punktlarining, ayniqsa eksport mavsumining qizg‘in paytida yopilishi Afg‘oniston iqtisodiyotiga sezilarli darajada zarar yetkazgan. Shu sababli yangi tashkil etilgan havo yo‘lagi Afg‘oniston eksport salohiyatini oshirishda muhim ahamiyatga ega bo‘lishi kutilmoqda.
Bu hamkorlik ikki davlat o‘rtasidagi iqtisodiy aloqalarni yanada mustahkamlashga xizmat qiladi.
