Singapur parlamenti internet firibgarligiga qarshi kurashni kuchaytirish maqsadida yangi jazo choralarini tasdiqladi. Bu haqda Zamin.uz xabar berdi.
Endilikda internetda firibgarlik qilgan shaxslar qamoq jazosi bilan birga jismoniy jazo — tayoq bilan kaltaklanish orqali ham jazolanadi. Bu haqda The Washington Post xabar berdi.
Rasmiy ma’lumotlarga ko‘ra, 2025 yilning birinchi yarmida Singapurda o‘n minglab firibgarlik holatlari qayd etilgan va ulardan yetkazilgan moliyaviy zarar 385 million dollardan oshgan. Ichki ishlar vaziri Sim Ennning ta’kidlashicha, har bir aybdorga kamida olti marta tayoq bilan jazo beriladi.
Ushbu jarayon tibbiy ko‘rikdan o‘tkazilgandan so‘ng maxsus moslamalarda amalga oshiriladi. Jazoda ishlatiladigan tayoqlar uzunligi 60–120 sm, qalinligi esa 4–13 mm bo‘lgan egiluvchan materiallardan tayyorlanadi.
Shu bilan birga, qonun 50 yoshdan oshgan erkaklar va barcha ayollarga nisbatan qo‘llanilmaydi. Yangi tartib firibgarlik holatlarini kamaytirish, fuqarolarni himoya qilish hamda mamlakatning moliyaviy xavfsizligini ta’minlashga qaratilgan.
