Chexiyalik Natali Pushkinova “Dunyo go‘zali 2025” g‘olibi bo‘ldi
Filippin poytaxti Manila shahrida o‘tkazilgan “Dunyo go‘zali 2025” tanlovida Chexiya vakili Natali Pushkinova g‘olib deb topildi. Bu haqda Zamin.uz xabar berdi.
Bu haqda Critical Beauty Philippines nashri xabar berdi. 21 yoshli Pushkinova Praga shahri yaqinida istiqomat qiladi va Karl universitetida “Marketing kommunikatsiyalari va ommaviy aloqalar” yo‘nalishida tahsil oladi.
U bir necha yildan buyon model sifatida faoliyat yuritib kelmoqda. Tanlovning final bosqichida 79 mamlakat vakilalari ishtirok etdi.
“Havo malikasi” unvoniga Islandiya vakilasi Sollis Vala Ivarsdottir, “Suv malikasi” unvoniga Vetnam vakilasi Chin Mi An, “Olov malikasi” unvoniga esa Tailand vakilasi Vari Ngamkham sazovor bo‘ldi. Eng yaxshi ko‘rinish uchun mukofot Kolumbiya vakilasiga, kechki libos namoyishidagi sovrin esa Kuba vakilasiga topshirildi.
Pushkinova tanlovdan so‘ng bergan intervyusida ilgari anoreksiya bilan bog‘liq muammolarga duch kelganini va model agentligi tomonidan haddan tashqari vazn yo‘qotishga majburlanganini aytib o‘tdi. U ushbu davrdan keyin o‘z hayotida yangi sahifa ochganini ta’kidladi.
Shuningdek, Pushkinova rus shoiri Aleksandr Pushkin bilan uzoq qarindoshlik rishtalari bo‘lishi ehtimolini ham inkor etmadi. “Dunyo go‘zali” tanlovi 2001 yildan beri o‘tkazilib keladi va u “Miss Universe”, “Miss World” hamda “Miss International” kabi yirik go‘zallik musobaqalari qatoriga kiradi.
Tanlovning asosiy maqsadi go‘zallik orqali ekologiya va atrof-muhitni muhofaza qilishga e’tibor qaratishdir. G‘oliblar keyinchalik turli mamlakatlarda atrof-muhitni himoya qilish bo‘yicha elchi sifatida faoliyat olib boradilar.
