Afrika qit’asida kolera epidemiyasi keng tarqalmoqda, deb xabar bermoqda Afrika Kasalliklarni nazorat qilish va oldini olish markazi (CDC). Bu haqda Zamin.uz xabar berdi.
2025 yil boshidan buyon qit’adagi 23 mamlakatda ushbu infeksiya qayd etilgan. Rasmiy ma’lumotlarga ko‘ra, jami 297 mingdan oshiq kishi kasallikka chalingan, ulardan qariyb 7 ming nafari hayotdan ko‘z yumgan.
Bu o‘lim darajasining 2,3 foizga yetganini ko‘rsatadi. Eng og‘ir vaziyat Angola va Burundida kuzatilmoqda.
Mutaxassislar bu davlatlarda sanitariya sharoitining yomonligi va toza ichimlik suvining yetishmasligi epidemiyaning kengayishiga sabab bo‘layotganini ta’kidlamoqda. Shu bilan birga, Janubiy Sudan, Sudan va Kongo Demokratik Respublikasida kasallanish holatlari biroz kamaygani qayd etilgan bo‘lsa-da, bu davlatlar hali ham xavfli hududlar sirasiga kiradi.
Mutaxassislar kuchli yomg‘irlar sabab epidemiyaning yil oxirigacha yana avj olishi mumkinligini ogohlantirmoqda. Kolera — Vibrio cholerae bakteriyasi orqali yuqadigan ichak infeksiyasi bo‘lib, asosan ifloslangan suv yoki oziq-ovqat orqali tarqaladi.
Jahon miqyosida esa 32 mamlakatda 518 mingdan ortiq kasallanish holati aniqlangan, ulardan 6,5 mingdan ziyod bemor vafot etgan. Shifokorlar aholiga gigiyena qoidalariga qat’iy rioya qilishni, faqat toza ichimlik suvidan foydalanishni va shubhali oziq-ovqat mahsulotlaridan ehtiyot bo‘lishni tavsiya etmoqda.
Sog‘liqni saqlash tizimlariga esa epidemiyaga qarshi tezkor choralarni kuchaytirish zarurligi eslatib o‘tilmoqda.
