Ilon Mask iqlimni boshqarish uchun yangi g‘oya taklif qildi
SpaceX kompaniyasining asoschisi Ilon Mask global iqlim o‘zgarishlariga qarshi kurashish uchun yangi g‘oya taklif qildi. Bu haqda Zamin.uz xabar berdi.
Bu haqda X (sobiq Twitter) platformasida xabar berildi. Maskning fikriga ko‘ra, sun’iy intellekt tomonidan boshqariladigan va quyosh energiyasida ishlaydigan maxsus sun’iy yo‘ldoshlar yordamida Yerga yetib keladigan Quyosh nurlari miqdorini boshqarish mumkin.
Bu esa iqlim o‘zgarishini cheklashga imkon beradi. Maskning ta’kidlashicha, bu tizim global miqyosdagi murakkab tuzilmalar yoki byurokratik qarorlarsiz iqlim jarayonlariga aniq va samarali ta’sir ko‘rsatish imkonini beradi.
U bu yondashuvni “insoniyat uchun energiya balansi ustidan ilmiy boshqaruv” deb atadi. Hozirda SpaceX kompaniyasining orbitada 9 mingdan ortiq Starlink sun’iy yo‘ldoshlari mavjud bo‘lib, ular asosan internet tarqatish maqsadida ishlatiladi.
Ammo Maskning yangi rejasi bu yo‘ldoshlarning vazifalarini kengaytirishni ko‘zda tutadi. Shu bilan birga, astronomlar bunday g‘oyaning salbiy oqibatlari haqida xavotir bildirmoqda.
Ularning fikricha, Quyosh nurlarini boshqarish atmosfera va iqlim tizimida kutilmagan o‘zgarishlarga olib kelishi mumkin. Mutaxassislar bu yondashuvni “quyosh geoinjeneriyasi” deb atashadi.
Ushbu uslubning asosiy maqsadi Quyosh nurlarining bir qismini boshqarish yoki bloklash orqali global isishni kamaytirishdir. Biroq olimlar bu usulning ijobiy natijalari bilan bir qatorda, insoniyat uchun xavf tug‘dirishi mumkinligini ham ta’kidlashmoqda.
Ilon Maskning ushbu g‘oyasi ilmiy doiralarda qizg‘in bahs-munozaralarga sabab bo‘ldi. Ayrimlar uni “innovatsion va fantastik fikr” deb baholasa, boshqalar bu yondashuvni “iqlim bilan xavfli tajriba” deb hisoblamoqda.
