Filippinda “Kalmaegi” tayfuni qurbonlari 140 kishiga yetdi
Filippinning markaziy va janubiy hududlariga yopirilgan kuchli “Kalmaegi” tayfuni mamlakat tarixidagi eng dahshatli tabiiy ofatlardan biri sifatida qayd etildi. Bu haqda Zamin.uz xabar berdi.
Rasmiy ma’lumotlarga ko‘ra, ushbu ofat oqibatida kamida 140 kishi halok bo‘lgan, yana 127 nafar fuqaro bedarak yo‘qolgan. Bu haqda mahalliy hukumat manbalariga tayanib, AFP axborot agentligi xabar berdi.
Filippin Fuqarolik mudofaasi milliy boshqarmasi hozirgacha 114 nafar qurbonni tasdiqladi. Shu bilan birga, Sebu viloyati hokimligi yana 28 kishi halok bo‘lganini ma’lum qildi.
“Associated Press” agentligining yozishicha, mamlakat Prezidenti Ferdinand Markos vaziyatning og‘ir ekanini inobatga olib, butun Filippin bo‘ylab favqulodda holat e’lon qilgan. Tabiiy ofat kuchli yomg‘ir, dovul va baland to‘lqinlar bilan birga kelib, qirg‘oqbo‘yi hududlarida yashovchi aholini katta xavf ostida qoldirdi.
Qariyb 400 ming kishi xavfli hududlardan evakuatsiya qilindi. Dengizdagi to‘lqinlar balandligi 4 metrgacha yetgani qayd etilgan.
Ayni vaqtda tayfun Vetnam yo‘nalishi bo‘ylab harakatlanmoqda. Ma’lumki, Filippin har yili o‘rtacha 20 ga yaqin tayfunni boshdan kechiradi.
2025-yilda esa bu ko‘rsatkich sezilarli darajada oshgan bo‘lib, yilning qolgan qismida yana 3–5 ta yangi tayfun kuzatilishi kutilmoqda. Eslatib o‘tamiz, “Kalmaegi” tayfuni sabab avvalroq 66 kishi halok bo‘lgani haqida xabar berilgan edi.
Hozirgi kunda qurbonlar soni oshib borayotgani va qutqaruv ishlari davom etayotgani ma’lum qilindi.
