Sankt-Peterburg shahrining Nevskiy tumanidagi Dybenko ko‘chasida joylashgan yarim yerto‘la kafeda noqonuniy spirtli ichimliklar savdosi amalga oshirilgani aniqlandi. Bu haqda Zamin.uz xabar berdi.
Mazkur holat huquqni muhofaza qilish organlari e’tiborini tortib, kafega reyd o‘tkazildi. Tekshiruv davomida kafening tegishli litsenziyasiz faoliyat yuritayotgani ma’lum bo‘ldi.
Politsiya xodimlari tomonidan mashhur brendlarning bo‘sh shishalariga to‘ldirilgan va qimmatbaho viski, jin hamda konyak sifatida taqdim etilgan soxta spirtli ichimliklar aniqlangan. Shuningdek, kafeda migratsiya qonunchiligi bir necha bor buzilgani qayd etildi.
Buzuvchilar orasida nafaqat mijozlar, balki kafe xodimlari, shu jumladan, 39 yoshli o‘zbekistonlik kafe egasi ham bor edi. Tekshiruv jarayonida ma’lum bo‘lishicha, kafe egasi ilgari ham sudlangan.
U javobgarlikdan qochishga urinib, politsiya xodimlaridan biriga pora taklif qilgan. Tadbirkor 100 ming rublni politsiya formasining cho‘ntagiga yashirincha joylashtirishga urindi.
Ammo bu harakatlari muvaffaqiyatsiz yakunlandi – u darhol ushlanib, pul daliliy ashyo sifatida olib qo‘yildi. Soxta spirtli ichimliklar ekspertizaga yuborildi.
Mazkur holat yuzasidan Rossiya tergov organlari pora taklif qilishga urinish va boshqa qonunbuzarliklar bo‘yicha jinoyat ishi qo‘zg‘atdi. Kafeda noqonuniy bo‘lib turgan chet ellik fuqarolar esa migratsiya qonunchiligiga muvofiq ma’muriy javobgarlikka tortildi.
