Gannibal Kaddafiy Livan qamoqxonasidan ozod qilindi
6-noyabr kuni Liviya Milliy kelishuv hukumati marhum Liviya rahbari Muammar Kaddafiyning o‘g‘li Gannibal Kaddafiyning ozod qilinganini e’lon qildi. Bu haqda Zamin.uz xabar berdi.
U 2015 yilda Livan poytaxti Beyrutda hibsga olingan edi. Bu haqda Lebanon24 axborot portali xabar berdi.
Rasmiy ma’lumotlarga ko‘ra, Livan hukumati Gannibal Kaddafiyni qamoqdan ozod qilgan va unga mamlakatdan chiqish taqiqini bekor qilgan. Shuningdek, sud tomonidan avval belgilangan 11 million dollarlik garov miqdori ham bekor qilingan.
Liviya hukumati Livan prezidenti Jozef Aun va parlament spikeri Nabih Berriga ushbu masalani hal qilishda ko‘rsatgan yordam va hamkorliklari uchun minnatdorlik bildirdi. Ma’lum bo‘lishicha, Gannibal Kaddafiyni 2015 yilda Suriya hududida “Amal” jangarilari o‘g‘irlab ketgan va keyinchalik Livan huquq-tartibot idoralariga topshirilgan.
2017 yilda esa u 1978 yilda Liviyada bedarak yo‘qolgan shia imomi Muso Sadr haqida ma’lumotni yashirganlikda ayblangan. Gannibal Kaddafiyning ozod qilinishi Livan va Liviya o‘rtasidagi kelishuvning bir qismi sifatida talqin qilinmoqda.
