Shimoliy Koreya AQSH sanksiyalarini keskin tanqid qildi
Shimoliy Koreya va AQSH o‘rtasidagi siyosiy ziddiyat yana kuchaymoqda. Bu haqda Zamin.uz xabar berdi.
Pxenyan rasmiylari AQSH tomonidan joriy etilgan yangi sanksiyalarga keskin bayonot bilan javob qaytardi. Bu haqda Shimoliy Koreyaning markaziy axborot agentligi xabar berdi.
Bayonotda aytilishicha, AQSHning bosim va tahdidlar orqali natijaga erishish siyosati Shimoliy Koreya uchun hech qanday ta’sir kuchiga ega emas. Pxenyan tashqi ishlar vaziri o‘rinbosari Kim In Chxorning ta’kidlashicha, “AQSH sanksiyalari na bizning fikrlash tarzimizga, na siyosiy pozitsiyamizga ta’sir qiladi.
Bu faqat Vashington siyosatining muvaffaqiyatsizligini ko‘rsatadi”. Shuningdek, Pxenyan sanksiyalarni “ahmoqona urinish” deb atab, AQSHning dushmanona siyosatiga qarshi munosib javob berishini ma’lum qildi.
Shimoliy Koreya fikricha, AQSHning bosim siyosati faqat ziddiyatni kuchaytiradi va diplomatik natija bermaydi. Ma’lumotlarga ko‘ra, joriy yil 4-noyabr kuni AQSH Moliya vazirligi kiberjinoyatlar va noqonuniy moliyaviy faoliyatda ayblanayotgan sakkiz nafar shimoliy koreyalik fuqaro va ikkita yuridik shaxsga sanksiya joriy etdi.
AQSH rasmiylari Shimoliy Koreya hakerlari 2017-yildan buyon uch milliard dollardan ortiq kriptovalyutani o‘g‘irlaganini ta’kidlamoqda. Ushbu kiberhujumlar Shimoliy Koreya razvedkasi bilan bog‘liq guruhlar tomonidan amalga oshirilgani aytiladi.
Shimoliy Koreya va AQSH munosabatlari 2018–2019-yillarda Kim Chen In va Donald Tramp o‘rtasidagi uchrashuvlardan keyin sovuqlashgan edi. O‘sha paytda tomonlar muzokaralarni davom ettirish niyatini bildirgan bo‘lsa-da, Pxenyan keyinchalik muloqotni rad etdi.
Joriy yilda esa Donald Tramp Osiyo safari davomida Kim Chen In bilan uchrashish istagini bildirgan, biroq bu reja amalga oshmadi. Sentyabr oyida Shimoliy Koreya yetakchisi AQSHni Pxenyandan yadroviy dasturdan voz kechishni talab qilmaslikka chaqirdi.
Bundan tashqari, Shimoliy Koreya va Rossiya o‘rtasidagi harbiy hamkorlik haqidagi xabarlar ham ko‘paymoqda. Xalqaro tahlilchilar fikriga ko‘ra, Pxenyan Ukrainadagi urushda Rossiyaga yordam bermoqda.
Janubiy Koreya razvedkasining ma’lumotlariga ko‘ra, Rossiya–Ukraina chegarasida taxminan 10 ming shimoliy koreyalik harbiy joylashtirilgan, yaqin kunlarda yana qo‘shin yuborilishi kutilmoqda. Shimoliy Koreya Vashingtonning sanksiyalar orqali siyosiy ustunlikka erishish urinishlarini keskin rad etar ekan, o‘zining mustaqil siyosatini davom ettirishini ma’lum qildi.
