Yerda magnit bo‘roni kuchayishi kutilmoqda

Yaqin soatlarda Yerda magnit bo‘roni kuchayishi kutilmoqda. Bu haqda Zamin.uz xabar berdi.

Mutaxassislarning ma’lumotiga ko‘ra, bo‘ronning kuchi G3 darajasiga yetishi mumkin. Bu haqda Rossiya Fanlar akademiyasining Kosmik tadqiqotlar instituti hamda Quyosh-Yer fizikasi institutining Quyosh astronomiyasi laboratoriyasi xabar berdi.

Hozirgi paytda Yer magnitosferasi nisbatan tinch bo‘lsa-da, vaziyat tez o‘zgarishi mumkin. Olimlar ta’kidlashicha, bugun ertalabdan boshlab magnit bo‘ronlari qayta faollashgan.

Hozirgi vaqtda ular G1-G2 darajasida saqlanmoqda. Biroq yaqin bir-ikki soat ichida bu bo‘ronlar kuchayib, G3 darajasiga yetishi ehtimoli yuqori.

Mutaxassislarning fikriga ko‘ra, bu jarayonning dastlabki belgilari allaqachon kuzatilmoqda. Magnit bo‘ronlari besh darajaga bo‘linadi: eng kuchsiz G1 darajadan boshlab, o‘ta kuchli G5 darajagacha.

Hozirgi magnit maydonidagi o‘zgarishlar quyosh plazmasi bulutlarining ta’siri hamda Yerga yo‘naltirilgan toj teshigi faolligi bilan bog‘liq. Ilgari o‘tkazilgan modellashtirish natijalari bo‘ronning G4 darajasidan oshmasligini ko‘rsatgan edi.

Ammo, agar vaziyat o‘zgarsa va Yerga to‘g‘ridan-to‘g‘ri zarba berilsa, bo‘ron kuchi maksimal G5 darajasiga yetishi ehtimoldan xoli emas.